Сокуоннар барылларын көрдүлэр

Мунньахха кэмитиэт чилиэннэрэ, норуот депутаттара Гаврил Алексеев, Михаил Габышев, Александр Корякин, Иван Макаров, Юрий Садовников, Дмитрий Семенов, ону таһынан ыҥырыылаахтар – СӨ экономикатын миниистирэ Валерий Максимов; СӨ ДьУоКХ уонна энергетика миниистирэ Алексей Колодезников; СӨ архитектуратын уонна тутар комплексын миниистирэ Вера Кузакова; СӨ үпкэ миниистирин солбуйааччы Павел Багынанов; СӨ прокурорун старшай көмөлөһөөччүтэ Егор Неустроев; СӨ Ааҕар-суоттуур палаататын аудитора Владимир Птицын уо.д.а. кыттыыны ыллылар.
Мунньах бэбиэскэтин бастакы пуунугар «2016 сылга СӨ государственнай бюджетын туһунан» СӨ сокуонун барылын туһунан үп миниистирин солбуйааччы Павел Багынанов дакылаат оҥордо. Павел Николаевич «2012-2019 сылларга хаачыстыбалаах олорор дьиэнэн хааччыйыы»; «2012-2019 сылларга хаачыстыбалаах дьиэ-уот-коммунальнай өҥөлөрүнэн хааччыйыы уонна электроэнергетика сайдыыта»; «2012-2018 сылларга СӨ сейсмическэй оройуоннарыгар олорор дьиэлэр, сүрүн объектар уонна олоҕу-дьаһаҕы хааччыйар систиэмэлэр туруктаныыларын үрдэтии» уонна «2012-2019 сылларга нэһилиэнньэлээх пууннарга гааһы киллэрии уонна СӨ гаас хаһаайыстыбата эрэллээх буолуутун хааччыйыы» государствен­най программалар үбүлэниилэригэр сиһилии тохтоон кэпсээтэ.
Кэмитиэт бэрэссэдээтэлэ Александр Романов: «Биһиги кэмитиэппит СӨ 4 государственнай программатын курируйдуур. Сылтан сыл аайы, туһааннаах ыарахаттар баалларын үрдүнэн, бу программалары олоххо киллэриигэ государственнай бюджеттан үбү көрүү үрдээн иһэр. Бу өрөспүүбүлүкэ Бырабыыталыстыба сөптөөх үлэни ыытарыттан», — диэн бэлиэтээтэ. Ил Түмэн сис кэмитиэтэ «2016 сылга СӨ государственнай бюджетын туһунан» СӨ сокуонун барылын өйүүргэ быһаарда.
«СӨ сиригэр-уотугар элбэх кыбартыыралаах олорор дьиэлэргэ капитальнай өрөмүөнү ыытыыны тэрийии туһунан» СӨ Сокуонугар уларытыылары киллэрэр туһунан” диэн өрөспүүбүлүкэ Бырабыыталыстыбата көҕүлээбит СӨ сокуонун барылын ДьУоКХ уонна энергетика миниистирэ Алексей Колодезников билиһиннэрдэ. Сокуон барыла «СӨ сиригэр-уотугар элбэх кыбартыыралаах олорор дьиэлэргэ капитальнай өрөмүөнү ыытыыны тэрийии туһунан» 2013 с. СӨ Сокуонугар сорох балаһыанньалары РФ олорор дьиэҕэ Кодексыгар сөп түбэһиннэрэр сыалтан оҥоһуллубут. Кэмитиэт бу сокуон барылын Ил Түмэҥҥэ бастакы ааҕыыга көрөргө быһаарда.
Бэбиэскэ үһүс боппу­руоһун — «Административнай сокуону кэһии туһунан РФ Кодексатыгар уонна РФ сокуонун аакталарыгар уларытыылары киллэрэр туһунан» федеральнай сокуон барылын Александр Романов билиһиннэрдэ уонна: «Маннык сокуон биһиги региоммутугар наадалаах. ДьУоКХ эйгэтигэр эппиэтинэһи үрдэтэр уонна чахчылаах иһитиннэриини хааччыйар», — диэн бэлиэтээн эттэ. Госдума депутаттарын бөлөҕө бу сокуон барылын ититии кэмигэр дьиэ-уот-комммунальнай хаһаайыстыба тэрилтэлэрин үлэтигэр государство хонтуруолун көдьүүһүн үрдэтэр сыалтан оҥорбуттар. Депутаттар бу федеральнай сокуон барылын биир куолаһынан өйөөтүлэр.
Мунньах бэбиэскэтин бүтэһик пуунунан «2012-2017 сылларга хаачыстыбалаах дьиэ-уот-коммунальнай өҥөлөрүнэн хааччыйыы уонна электроэнергетика сайдыыта» СӨ государственнай программатын «Ыраас уу» уонна «СӨ сиригэр-уотугар оҥорон таһаарыы уонна туһаныы тобохторун харайыы» диэн хос программаларын олоххо киллэриигэ СӨ государственнай бюджетын үбүг туһаныы сокуоннаһын уонна көдьүүһүн бэрэбиэр­кэлээһин туһунан хонтуруоллуур тэрээһин түмүктэрин туһунан иһитиннэрии буолла. Иһитин­нэриини СӨ Ааҕар-суоттуур палаататын аудитора Владимир Птицын оҥордо. Ил Түмэн тутууга уонна дьиэ-уот, коммунальнай хаһаайыстыбаҕа сис кэмитиэтэ Ааҕар-суоттуур палаата аудиторын дакылаатыгар этиллибит чахчыларга олоҕуран министиэристибэлэр, муниципальнай тэриллиилэр, тэрилтэлэр рекомендациялары 2015 сыл ахсынньы 15 күнүгэр диэри оҥороллоругар быһаарда.