1135
13 ноября 2015 в 18:14
Саҥа дьиэлэринэн!
Норуот сомоҕолоһуутун күнүн иннинэ Нөөрүктээйи нэһилиэгэр олохтоох дьоҥҥо икки улахан үөрүүлээх түгэн буолан ааста – ол 30 квартиралаах үс этээстээх олорор дьиэни уонна администрация хонтуоратын аһыы. Олорор дьиэ пилотнай бырайыак, «Гражданнары саахалланар туруктаах олорор дьиэлэртэн көһөрүү» өрөспүүбүлүкэтээҕи тус аадырыстаах программаны олоххо киллэрии уонна төрөппүт харалтата суох хаалбыт тулаайах оҕолору олорор дьиэнэн хааччыйыы чэрчитинэн тутулунна. Объекка бэдэрээтчитинэн «АрктикаСтрой» ХЭТ үлэлээтэ, 30 квартира барыта толору хааччыллыылаах, дьиэ ситтэ уонна куттал суох буолуутун бары ирдэбиллэригэр эппиэттиир.
Бу күн саҥа дьиэлээхтэри эҕэрдэлии МО баһылыга Николай Старостин уонна МО баһылыгын 1-кы солбуйааччы Павел Сазонов кэллилэр. Үөрүүлээх түгэн үгэс курдук айыылартан көрдөһөн, алаадьылаах, кымыстаах, саҥа дьиэни арчылыыр алгыс сиэриттэн-туомуттан саҕаланна. Саҥа дьиэлэммит хаһаайыттары уонна ыалдьыттары «Алгыс» үҥкүү ансаамбыла «Чороонноох үҥкүүтүнэн» эҕэрдэлээтэ.
МО баһылыга Николай Старостин саҥа дьиэлээхтэри уонна ыалдьыттары эҕэрдэлээтэ: «Биһиги оройуоммут 2009 сылтан хаарбах уонна саахалланар туруктаах олорор дьиэлэртэн гражданнары көһөрүү программатыгар актыыбынайдык кыттар. Бу үлэни бөдөҥ нэһилиэнньэлээх пууннартан: Майаттан, Аллараа Бэстээхтэн, Павловскайтан, Төхтүртэн, Табаҕаттан, Хаптаҕайтан уонна Хараттан саҕалаабыппыт. Тыа сиригэр олорор дьоҥҥо бу программа олус наадалаах, биһиги судаарыстыба өйөбүлүн уонна көмөтүн сөпкө туһаныахтаахпыт. Инникитин биһиги бу программаҕа өссө күүскэ уонна улахан кээмэйинэн үлэлиэхпит, ол эбэтэр оройуоҥҥа өссө да элбэх киһи көһөрүүгэ наадыйар».
Объегы тутууга кылааттарын, бэйэлэрин эбээһинэстэрин үтүө суобастаахтык толорбуттарын уонна Нөөрүктээйи нэһилиэгин социальнай-экономическай сайдыытыгар тус кылааттарын иһин махтал суруктары «АрктикаСтрой» ХЭТ директорын солбуйааччы Иван Никифоров, «АрктикаСтрой» ХЭТ прораба Дмитрий Егоров, чааһынай предприниматель Николай Дмитриев, электромонтажниктар биригэдьиирдэрэ Афанасий Егоров, сантехник Виталий Харитонов, отделочниктар биригэдьиирдэрэ Тимиркул Куйташев уонна Александр Петров туттулар.
Пилотнай бырайыагынан квартира күлүүһүн – 7 киһи, «Гражданнары саахалланар туруктаах олорор дьиэлэртэн көһөрүү» программатынан – 8 киһи уонна төрөппүт харалтата суох хаалбыт тулаайах оҕолору хааччыйыыга – 4 киһи ыллылар. Аалай кыһыл лиэнтэни быһыы уонна саҥа дьиэлэр күлүүстэрин кытта уопсай хаартыскаҕа түһүү кэнниттэн, дьон үөрүүлэрин кистээбэккэ, бэйэлэрин дьиэлэрин көрө киирдилэр, оттон сорохтор администрация саҥа дьиэтин аһыыга тиэтэйдилэр.
Дьаһалта саҥа дьиэтин аһыыга нэһилиэк олохтоохторун МО баһылыгын бастакы солбуйааччы Павел Сазонов эҕэрдэлээтэ, кини ааспыт өттүгэр Нөөрүктээйи баһылыгынан олорон, социальнай суолталаах саҥа объегы тутууга улахан кылаатын киллэрбитэ. Дьаһалта саҥа дьиэтин тутуу 2013 сылга саҕаламмыт. Бу үлэни олохтоох бюджет үбүлээбит. Былааннаммытын курдук, дьиэ 2 этээстээх, олохтоох депутаттарга анаан аактабай саалалаах уонна гаражтаах. Кэнэҕэс дьиэни толору хааччыллыылаах оҥоруохтаахтар. Билигин дьиэ гааһынан ититиигэ көспүт, онон ДьУоКХ ороскуоттара хас да төгүл сарбыллыахтара.
Нөөрүктээйи нэһилиэгин баһылыга Николай Федоров саҥа объект туһунан кэпсээтэ: «Нэһилиэк баһылыгын дуоһунаһыгар үлэлии киирэрбэр дьиэни тутуу сүрүн үлэтэ номнуо түмүктэммит этэ. Бу дьиэ сэндвич-панеллартан, полистиролу сылытыыга туһанан, каркаһынан тутуу аныгы технологиятынан тутуллубута. Бэдэрээтчит – чааһынай предприниматель Игорь Попов, тас оҥоһуутун нэһилиэк депутата Георгий Егоров, оттон ис өттүн – биһиги биир дойдулаахпыт Владислав Ефремов оҥорбуттара, электромонтажнай үлэлэрин ЧП Николай Старостин ситэрбитэ. Онон бу дьиэ тутуутугар кылааттарын киллэрбит бары дьоҥҥо улахан махталы биллэриэхпин баҕарабын!»
Саргылаана РОМАНОВА.
