Нам нэһилиэнньэтэ улаатар

Бэлиэтээн этэр буоллахха, мантан 13 киһи “Биир ньыгыл Арассыыйа” партияттан турбута. “Нам улууһа” муниципальнай тэриллии депутаттарын оройуоннааҕы Сэбиэтин бэрэссэдээтэлэ Иван Попов, арааһа, өрөспүүбүлүкэ эдэр бэрэссэдээтэллэриттэн биирдэстэрэ буолуохтаах. Кини сэбиэт үлэтин, былааннарын туһунан кылгастык кэпсээтэ:
— Саҥа ылыллаары турар “СӨ тыа хаһаа­йыстыбатын сайыннарыы туһунан”, сир боппуруоһугар, төрөппүт эппиэтинэһигэр аналлаах сокуон барылларыгар улуус мунньаҕын аатыттан барытыгар кыттабыт. Тустаах кэмитиэттэри, баһылыктары кытта дьүүллэһэбит. Дьокуускайтан Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников, Ил Түмэн депутата Алексей Еремеев тахсаннар нэһилиэнньэни кытта көрсөн, кэпсэтии, дьүүллэһии, санаа түмүүтэ буолбута. Нэһилиэктэр бу ылыллаары турар сокуоннарга туох этиилэрдээхтэрин, санаалаахтарын киллэрэллэригэр сорудах биэрбиппит. Нэһилиэнньэ санаата түмүллэн этии быһыытынан Ил Түмэҥҥэ барбыта.
Ый аайы сессиябыт кэмигэр ыытыллар. Билигин бюджет таҥааһына буола турар. Быйыл уларыйыы киирэн, урут бюджеты үс сылга ылынар эбит буоллахпытына, билигин биир сыллааҕыны ылынарга диэн буолла. Аны муниципальнай тус сыаллаах бырагырааманы бигэргэтии ситэриилээх уорганнарынан барар, оттон урукку өттүгэр депутаттар бигэргэтэллэрэ. 2016 сылга уопсайа 22 муниципальнай тус сыаллаах бырагырааманы былааннаан олоробут.
Хайа баҕар тыа сирин улууһун проблемалара сүнньүнэн биир соҕустар. Кыһалҕа ханна барыаҕай, баар бөҕө буоллаҕа. Ол эрээри, олох кыайтарбат, быһаарыллыбат кыһалҕа диэн суох. Намнар, арыый уратыбыт диэн, кэнники сылларга тыа хаһаайыстыбатыгар улахан болҕомтону уурабыт. Ол курдук, көрүллэр үп-харчы кээмэйэ биллэ үрдээтэ. Тыа хаһаайыстыбатыгар үбү көрүүгэ өрөспүүбүлүкэҕэ инники күөҥҥэ сылдьабыт. Саамай сүрүнэ диэн, түмүгэ көдьүүстээх буолуохтаах. Өрөспүүбүлүкэ түһэрэр сорудахтара туолууларыгар үлэ күүскэ барыахтаах. Биһиги өрөспүүүбүлүкэ ыытар политикатыгар олоҕуран этэҥҥэ дьаһанан олоробут. Тыа сирин сайыннарыы боппуруостарыгар дьиҥнээхтик хотоҥҥо, сыһыыга сылдьар, оҕуруотунан дьарыктанар дьон санааларын учуоттуохпутун наада дии саныыбын. Улуус баһылыга Александр Павлович Атласов нэһилиэктэринэн отчуоттууругар тэҥҥэ сылдьан дьону-сэргэни кытта алтыһабыт.
Нам улууһун нэһи­лиэнньэтэ сыл аайы улаатар. Дьон дьиэ-уот туттан, хаһаайыстыба тэринэн олохсуйар. Ордук хотуттан, Бүлүү бөлөхтөн көһөн кэлэр буоллулар. Манна географиябыт табыгастааҕа эмиэ оруолу оонньуур буолуохтаах. Ону таһынан, гаас ситимэ, асфальт суол бааллар уонна Дьокуускайтан чугаспыт. Биһиги уокуруктан быыбардаммыт Ил Түмэн депутаттара Алексей Ильич Еремеевы, Алина Романовна Винокурованы, Николай Иннокентьевич Румянцевы уонна Петр Петрович Юмшановы кытта бииргэ үлэлэһэбит. Кинилэр куруук нэһилиэктэринэн сылдьан быыбардааччыларын кытта көрсөллөр, — диэн кэпсээтэ Иван Романович.
Ити курдук, улуустааҕы Сэбиэт оройуон олоҕор-дьаһаҕар былааннары торумнуур, сокуону оҥорууга кыттыһар.

Мария ПАВЛОВА.