Тыа хаһаайыстыбатын үөрүйэхтэригэр оскуолаттан саҕалаан

Парламентарий Александр Уаров сэтинньи 20 күнүгэр Ил Түмэн депутата Александр Миронов сырдык кэриэһигэр анаммыт тэрээһин кэнниттэн Үөһээ Бүлүү уонна Бүлүү улуустарын агрооскуолаларын дириэктэрдэрин кытта көрүстэ. 2015-2016 үөрэх дьылыгар Саха сирин тыа хаһаайыстыбатыгар хайысхалаах оскуолаларын холбоһуктарыгар 96 уопсай үөрэх оскуолата киирэр. Маннык оскуолаларга оҕолор оҕуруот аһын үүннэриигэ, сири туһаныыга, сүөһүнү иитиигэ, балыктааһыҥҥа уо.д.а. тыа хаһаайыстыбатын салааларыгар сүрүн тустаах билиини ылаллар уонна ити салааларга үлэлиир үөрүйэхтээх буоларга уһуйуллаллар. Билигин Үөһээ Бүлүү улууһугар уопсайа сэттэ, Бүлүүгэ үс маннык хайысхалаах оскуола үлэлиир. Александр Уаров: “Yөhээ Бүлүүтээҕи Исидор Барахов аатынан 1 №-дээх агрооскуолаҕа (дириэктэр Анатолий Викторович Заха­ров) түөрт “супер-кэбиниэт” тэриллибит. Ол аата, кылаас­тарга Интернет ситимэ тардыллар, көмпүүтэринэн, диа­проекторынан, интерак­тивнай дуосканан уо.д.а. аныгы технологиянан толо­ру хааччыллаллар. Бу оскуола өрөспүүбүлүкэҕэ биир бастыҥ көрдөрүүлээх Кэнтик агрооскуолатын (дириэктэр Ольга Васильевна Астанова) кытта быйылгыттан кооперациялаһан биир ситимнээхтик үлэлииллэр эбит. Ол курдук, тэҥҥэ муҥхалыыллар, хортуоппуй, оҕуруот аһын араас көрүҥүн үүннэрэллэр. Ону таһынан, кэнтиктэр, Чап уустарын сыдьааннара буолалларын быһыытынан, тимиринэн уһанар мастарыскыай тэрийэн үлэлэтэ олороллор. Оҕолор тимиринэн уһаныы кистэлэҥнэрин баһылыы үөрэнэллэр. Улууска быыстапка тэрийэн, сакаас бөҕө киирэн, 700 тыһ. солк. уу харчынан киллэрэн, спортивнай площадка туттубуттар. Бу оскуола 2014-2015 сс. үөрэх дьылын түмүгүнэн, өрөспүүбүлүкэ агрооскуолаларын күрэхтэригэр үһүс миэстэҕэ тиксэн, Тыа хаһаайыстыбатын министиэристибэтин 500 тыһ. солк. гранынан наҕараа­даламмыт. Кэнтик оскуолатыгар былырыыҥҥы үөрэх дьылыттан “Олоҥхо оскуолата” тэриллэн үлэлиир. Тамалакаан агроос­куолатыгар (дириэктэр Спиридон Иванович Федоров) быйылгы үөрэх дьылыгар 102 оҕо үөрэнэр. Кинилэр сүөһү иитиитинэн күүскэ дьарыктаналлар. Муус устар ыйтан оттуллар теплицаҕа оҕуруот аһын үүннэрэн саҕалыыллар. Ону таһынан 100 төбө ынах сүөһү турар хотонноохтор, оттуур, бурдук ыһар бааһыналаахтар, балыктыыр күөллээхтэр. Онон, Үөһээ Бүлүү агрооскуолалара оҕолору тыа хаһаайыстыбатын салааларыгар сыһыаран иитиигэ дьоһуннаахтык үлэлии олороллор”, — диэн бастыҥ үлэлээх оскуолалар тустарынан бэлиэтээн эттэ. Ахсынньы ыйга Ил Түмэн Бэрэссэдээтэлэ Александр Жирков Саха сирин агрооскуолаларын дириэк­тэр­дэрин кытта көрсөрө былааннанар. Александр Сер­геевич дириэктэрдэргэ бу көрсү­һүүгэ, үлэлэрин уопутун тарҕатар сыалтан, быыстапка тэрийэн аҕалалларыгар эттэ. Оттон Бүлүү улууһун агрооскуолалара, чуолаан Бороҕон оскуолата, үчүгэй көрдөрүүлээхтик үлэлииллэрин бэлиэтээтэ. “Маннык оскуолалар оҕолорго тыа хаһаайыстыбатын салааларын наадалаах үөрү­йэхтэрин баһылыыр кыаҕы биэрэллэр”, — диир Александр Уаров.
Агрооскуолалар тыа сирин олоҕун уйгутун, ahы-үөлү дэлэтиини, сүөһү иитиитин сүрүн сорук оҥостон дьон-сэргэ уйгу-быйаҥ олохтоноллоругар бэйэлэрин кылааттарын киллэрэллэрэ саарбаҕа суох.
Сэтинньи 21 күнүгэр Ил Түмэн депутаттара Александр Уаров уонна Леонид Владимиров Үөһээ Бүлүү улууһугар өссө Сэ­биэскэй кэм саҕана, 80-с сылларга, тутуллубут биэс бөһүөлэги уунан хааччыйар систиэмэлэри кэрийэн көрдүлэр. Бу тэриллэр уу элбээтэҕинэ ууну түһэрэр, кураан турдаҕына ууну тутар аналлаахтар.
Ити курдук, депутаттар тыа сирин олоҕун-дьаһаҕын, баар кыһалҕалары, ситиһиилэри кытта сиһилии билистилэр.

Мария ПАВЛОВА.