05 мая 2017 в 09:53

Александр Жирков Нью-Йорка сессия үлэтигэр кыттар

Россия Бырабыыталыстыбатын бэрэссэдээтэлэ Дмитрий Медведев дьаһалынан, Нью-Йорка ХНТ штаб-квартиратыгар ХНТ төрүт норуоттар боппуруостарыгар Бастайааннай форумун 16-с сессиятын үлэтигэр РФ национальностар дьыалаларыгар Федеральнай агентствотын салайааччыта Игорь Баринов салалтатынан Россия Федерациятын официальнай делегацията кыттар. Ил Түмэн пресс-сулууспата иһитиннэрбитинэн, бу тэрээһиҥҥэ Саха сириттэн Ил Түмэн Бэрэссэдээтэлэ Александр Жирков кыттар.

Төрүт норуоттар боппуруостарыгар ХНТ Бастайааннай форумун 16-с сессиятыгар кыттар кэмигэр пар-ламент спикерэ Александр Жирков ыам ыйын 3-4 күннэригэр ХНТ төрүт норуоттар боппуруостарыгар Бастайааннай форумун секретариатын салайааччыта хотун Чандра Рой Хенриксены кытта көрсүөхтээх. Ону сэргэ ХНТ иһинэн РФ Бастайааннай Бэрэстэбиитэлистибэтин итиэннэ Америка естественнэй историяҕа музейын (АМЕИ) салайааччыларын кытта көрсүһүү былааннаммыта.

Александр Жирков бэлиэтээбитинэн, ити көрсүһүүлэргэ Нью-Йорка баар Америка естественнэй историяҕа музейын уонна Вашингтоҥҥа Смитсон институтун естественнэй историяҕа Национальнай музейын (НМЕИ) коллек-цияларыгар анаммыт “XVII үйэҕэ -XX үйэ саҕаланыытыгар Саха сирин норуоттарын материальнай уонна духуобунай култуурата аан дойду музейдарыгар” системалаах каталог I туомун сүрэхтээһини ХНТ Бастайааннай форумун уонна АМЕИ тэрээһиннэрин былааныгар киллэрэр кыаҕы дьүүллэһии былааннанар.

Биллэрин курдук, 2012 саҕалаан Саха Өрөспүүбүлүкэтэ ити аан дойдутааҕы бырайыагы олоххо киллэриигэ үлэлиир. Бырайыак сыалынан Россия, АХШ уонна Европа музейдарыгар харалла сытар Саха сирин норуоттарын материальнай уонна духуобунай култуураларын объектарын, норуот маастардарын айымньыларын толору систиэмэлэммит каталогун оҥоруу буолар. Бу бырайыак ХНТ төрүт норуоттар боппуруостарыгар Бастайааннай форумун өйөбүлүн ылбыта. Бастакы туома саха, эбээн, юкагир норуоттарын материальнай култууратын объектарын түмэн көрдөрүөҕэ.