Саҥа оскуола – доҕордоһуу тутуута

Н.В.Егорова баһылыктаах Лөгөй нэһилиэгин киинигэр Кэптэнигэ 2015 сыл олунньу 17 күнүгэр тутуу бэдэрээтчитэ «Чараҥ» ААО директора В.В.Жирков хамаандатынан СР народнай артыыһа В.Заболоцкай аар алгыһынан, СР Государственнай Мунньаҕын (Ил Түмэн) бэрэссэдээтэлэ А.Н.Жирков аан тылынан модун кыраан бастакы сыбаайаны түһэрбитэ.
Онон саҥа таас оскуола тутуутун «Чараҥ» ХЭТ саҕалаан «нулевой циклын» тутан бүтэрбиттэрин кэннэ, күһүн ыытыллыбыт тендергэ «ВЕНС+» ХЭТ тутааччылара кыайан, элбэх таас тутууну киин куоракка, араас улуустарга дьэндэппит, улахан уопуттаах тутааччылардаах «Норд Инжиниринг» диэн 30-ча үлэһиттээх Н.Я. Егоров салайааччылаах тэрилтэ балаҕан ыйын ортотуттан күһүҥҥү силбиги, кыһыҥҥы тымныыны аахсыбакка үлэлии сылдьар. Чахчы даҕаны доҕордоһуу тутуута диэх курдук – биэс араас омук түмсүбүт. Сахалар, нууччалар, армяннар, таджиктар, узбектар саҥа таас оскуола тутааччыларынан буолбуттар. Уопсайа 4946 кв.м иэннээх сиргэ 2500 кв.м тутуу бара турар. Колонналар тутуулара бүппүт. Бу күннэргэ кирилиэс истиэнэтин кута сылдьаллар. Биллэн турар, кыһыҥҥы күннэргэ олус ыарахан, дэбигис киһи сыстыбат үлэтэ. Ону ол диэбэккэ, кыахтарын, сатабылларын ууран үлэлииллэрин, сарсыарда 8-тан киэһэ 8 чааска диэри аһаҕас халлаан анныгар хамсаналларын олохтоохтор сөҕө көрөллөр. Кыраан, погрузчик, «УАЗ» техникалар гарааһынан хааччыллыбыттар.
Ахсынньы 1 күнүгэр Лөгөй орто оскуолатын тэрийиитинэн «Доҕордоһуу түһүлгэтэ» ыытылынна. Бу күн үөрэнээччилэр, олохтоохтор саҥа тутуу устун экскурсиялаатылар. Манна «Новое строительство» ХЭТ директора А.Н.Титов, биригэдьиир, инженер С.А.Сидоров ханнык матырыйаалынан тутулларыттан саҕалаан, ханан ханнык кэбиниэттэр оҥоһуллуохтаахтарыгар тиийэ батыһыннара сылдьан, кэпсээтилэр. Бу экскурсия идэни таба талыыга кытары хайысхалаах буолла. Күнүс 2 чаастан олохтоохтор, оскуола үлэһиттэрэ, тутааччылар икки ардыларыгар буулдьалаах саанан ытыыга, остуол тенниһигэр, волейболга, саахымакка, дуобакка, остуол тенниһигэр, ханаат тардыһыытыгар күрэхтэстилэр. Бэрт тыҥааһыннаах күрэхтэһии араас омук хаһыытынан арыалламмыта истиэххэ күндүтэ. Киэһэ 7 чаастан «Доҕордоһуу түһүлгэтэ» ис сүрэхтэн тэриллибит киэһэҕэ «Норд Инжиниринг» директора Н.Я.Егоров бөһүөлэк олохтоохторугар, дьаһалта баһылыга Н.В.Егороваҕа, учаастактааҕы балыыһа сүрүн бырааһа Р.Н.Петуховаҕа, үлэһиттэригэр олорор, үлэлиир, эмтэнэр усулуобуйаны тэрийэллэрин иһин махтанна. Николай Яковлевич: «Элбэх улахан тутууну араас тыа сирдэригэр ыытан кэллибит даҕаны, маннык истиҥник ханна даҕаны көрсүбэтэхтэрэ, болҕомтолоох сыһыаҥҥыт иһин махталбытын тириэрдэбит. Биһиги тутуубут биригээдэтэ – интернациональнай. Уолаттарым эйэлээхтик биир ыал курдук олороллор, үлэлииллэр», – диэтэ. Лөгөй орто оскуолатын директора С.И.Сысолятин оскуоланы тутааччылар тэтимнээх үлэлэрэ бу курдук салгыы барарыгар баҕарда, күн хайдах ааспытын билиһиннэрдэ. Салгыы тылы армяннар биригэдьиирдэрэ Агарон Сарикиевич Сукиасьян ылла: «Саха сиригэр араас куораттарынан, улуустарынан таас тутууну туппутум 25 сыл буолла. Саха сирэ, ордук Амма – мин иккис дойдум. Биһигини кытары бу дэриэбинэҕэ үөрэнээччилэр, олохтоохтор дорооболоһо сылдьалларыттан, үлэбитигэр, сынньалаҥмытыгар мэһэйдэспэттэриттэн үрдүк култууралаах дэриэбинэ диэн сыаналыыбыт. Өссө доҕордуу тутуубут үлэҕэ киирэрин күүтэбит», – диэтэ. Таджикистан тутааччыларын биригэдьиирэ Азии-Зон Суванкулов бэйэтин итии дойдутун олоҕун-дьаһаҕын билиһиннэрдэ. Азии-Зон Саха сиригэр үлэлээбитэ иккис сыла эбит, тымныыга үөрэммит, сахалар астарын, майгыларын сөбүлээбит. Оскуола үөрэнээччилэрэ бэрт сэргэх концеры көрдөрдүлэр. Дьэ, ити кэнниттэн сахалыы астаах сандалыга ыалдьыттаатылар. Итии дойдуттан тутааччыларбыт Лөгөй оскуолатын коллектива бэлэмнээбит сахалыы аһын дуоһуйа амсайдылар.

Ульяна БУРНАШЕВА,
журналист.