Бордоҥ Болуодьата нэһилиэгин ааттатар

Өрөспүүбүлүкэ спорду сэҥээрээччилэрин ортолоругар Бордоҥ Болуодьа аата киэҥник биллэр. Владимир Николаевич — Сунтаар улууһун Бордоҥ нэһилиэгин төрүт олохтооҕо. Бордоҥ – улуус биир элбэх киэн туттар дьонноох, баай историялаах нэһилиэгэ. Өрөспүүбүлүкэ биир бастыҥ спортсмена Наталья Леонтьева эмиэ Бордоҥтон төрүттээх.
Бордоҥ Болуодьата үйэтин тухары спорт эйгэтигэр үлэлээн кэллэ. Убайа Вячеслав Карпов суолун батыһан, эдэр эрдэҕиттэн тустуунан уонна дуобатынан үлүһүйэр. Маны сэргэ Сунтаарга биир бастакынан бильярд көрүҥүн саҕалаабыт, бэйэтин үбүнэн бириис олохтоон, сүүрэн-көтөн бильярд күрэҕин тэрийбит киһинэн эмиэ Бордоҥ Болуодьата буолар. Оччолорго Ил Түмэн депутатынан үлэлээбит А.П.Морозкин көмөтүнэн нэһилиэгэр бильярд остуолун туруортарбыт.
Владимир Николаевич ахсаана биллибэт үгүс республикатааҕы турнирдары тэрийэн ыыппыта. Ол курдук, хапсаҕайга маастар нуормалаах В.Д.Федотов аатынан тур­нир, оҕолорго Ил Түмэн депутата А.С.Уаров бирииһигэр көҥүл тустуу күрэҕэ, спорт маастара Виктор Петров аатынан дуобакка республикатааҕы турнир, икки гроссмейстер Гаврил Колесов уонна Иван Токусаров ааттарынан дуобакка күрэхтэһии…Маны барытын иилээн-саҕалаан, сүүрэн-көтөн тэрийээччи Владимир Петров буолар.
“Улуус таһымнаах күрэхтэһиилэр биһиги нэһилиэкпитигэр сотору-сотору буолаллар. Ону таһынан бүттүүн саха норуотун киэн туттуута, чаҕылхай тустуук Николай Захаров – Сахаачча аатынан республика турнирын тэрийбитим. Томпоҕо үлэлээбит, Виктор Лебедевы эрчийэн таһаарбыт Юрий Васильев 65 сааһын бэлиэтээбиппит. Саха аатырбыт боксера, сахалартан бастакы Россия призера Николай Сантаев бирииһигэр эмиэ күрэх ыыппыппыт. 1955 с. көҥүл тустууга оҕолорго бастакы Аан дойду чемпионата ыытыллыбыта. Соторутааҕыта ол чемпионат 60 сылын бэлиэтээтибит”, — диэн үллэстэр Бордоҥ Болуодьата.
Улуу тустууктар, бастыҥ бөҕөстөр Роман Дмитриев, Павел Пинигин, Александр Иванов, Николай Захаров – Сахаачча, улуу тренер Дмитрий Коркин талаан­нарыгар сүгүрүйэн, көҥүл тустууга видеоклип оҥотторбут.
Владимир Николаевич үс кинигэ ааптара буолар. 2007 с. “Дуобатчыт убайбын ахтан-санаан”, 2008 с. “Сахаачча сырдык сулуһа”, 2014 с. “Тустуу профессора” кинигэлэри бэчээттэтэн таһаарбыт. “Сахаачча сырдык сулуһа” кинигэ киирии тылыгар “Амма улууһа” МТ оччотооҕу баһылыга Александр Артемьев маннык суруйбут: “Бу дьоҕус таһаарыыга киирбит ахтыылары, хаартыскалары биһиги биир кэскиллээх, элбэҕи эрэннэрэр уонна дьон-сэргэ барыта киниттэн элбэҕи кэтэһэ санаабыт Амма хотун хоһуун ыччатын спортка суолун, дьылҕатын оҕо эрдэҕиттэн сэҥээрэн, холобур оҥостубут Сунтаар Бордоҥуттан төрүттээх спорт энтузиаһа, тустууга тренер Владимир Николаевич Петров 40 сыл устата мунньубута, хараҕын харатын курдук харыстаан илдьэ сылдьыбыта”. Аҥардас бу тыллартан Бордоҥ Болуодьата саха спордун үйэтитиигэ киллэрбит сүдү кылаатын туһунан өйдүөххэ сөп.
Бордоҥ Болуодьата: “Биһиги тустууга ыытар күрэхтэрбитигэр аан дойду улуу спортсменнара Роман Дмитриев, Александр Иванов, Павел Пинигин, Леонид Спиридонов уо.д.а. кэлэн ыалдьыттаан ааспыттара. Кинилэр ыччаттары кытта алтыһан, семинар ыытан күрэхтэһиилэри киэргэтэллэрэ. Дуобат күрэхтэригэр эмиэ биллэр спортсменнар Г.Колесов, И.Токусаров, А.Азаров, С.Николаев кэлэ сылдьыбыттара. Биһиги ыытар үлэбит барыта ыччат туһугар”, — диэн үөрэ кэпсээтэ.
Владимир Николаевич аҥардас спордунан эрэ үлүһүйбэккэ, нэһилиэк историятын эмиэ интэриэһиргиир, үгүс матырыйаалы ааҕар, мунньар. Нэһилиэк историятын үйэтитии курдук кэскиллээх дьыалаҕа ылсан үлэлээбит бэлиэтигэр доҕоро Ахмет Дмитриевы кытта “Сунтаар былыргыта. Бордоҥхой таҥаралаах Бордоҥнор” кинигэни бэлэмнээбиттэр. Кинигэ сүрэхтэниитэ бу күннэргэ буолар. Маннык дириҥ суолталаах үлэни Бордоҥ кэнчээри ыччата үйэ-саас тухары сыаналаан, үөрэтэн туһана сылдьыахтара буоллаҕа.
Владимир Николаевич — спорду таптааччы, төрөөбүт дойдутун туһугар үлэлиир-хамсыыр киһи бастыҥ холобура.

Балаһаны бэлэмнээтэ
Мария ПАВЛОВА.