«Биир ньыгыл Россия» олохтоох салаата быыбарга бэлэм

Конференция үлэтигэр партия регионнааҕы политическай сэбиэтин чилиэттэрэ, улуустааҕы исполком салайааччылара, бастакы сүһүөх тэрилтэлэр бэрэстэбиитэллэрэ кыттыыны ыллылар. Ону тэҥэ «Биир ньыгыл Россия» партия Уһук Илин федеральнай уокуругар киин ситэриилээх комитетыттан Дмитрий Попиков кэлэ сырытта.
Партия Саха сиринээҕи салаатын сэкирэтээрэ Александр Ноговицын «ньыгыллар» нэһилиэнньэ убаастабылынан туһанан, дойду президенэ Владимир Путин, премьер-министр, партия салайааччыта Дмитрий Медведев, Ил Дархан Егор Борисов тула түмсэн, дойду сайдарын туһугар биир сомоҕо буолан, быыбарга үлэлиэх тустаахтарын тоһоҕолоон бэлиэтээтэ. «2015 сыл дойдубутугар уустук быһыы-майгы тыҥаан кэлбитинэн бэлиэ буолла, онуоха дойдубут ис кыаҕын сөпкө туһанан, политикатын уонна экономикатын эйгэлэрин тас дьайыыттан харыстыах тустаахпыт”, – диэн Александр Ноговицын партия үлэтин сүрүн сыалын-соругун туруорда. Партия бүгүҥҥү күҥҥэ 35 киэҥ хабааннаах, олох-дьаһах хаачыстыбатын тупсарарга анаммыт инфраструктурнай уонна социальнай бырайыактары сүрүннүүр.
2016 cылга Александр Ноговицын партия регионнааҕы салаатын сүрүн соругунан Госдума быыбарыгар ситиһиилээх бэлэмнэнии үлэтин ааттаата. Ону тэҥэ партия сэкирэтээрэ республика 20 оройуонугар муниципальнай быыбар буолуохтааҕын санатта. Ол курдук, Булуҥ, Эдьигээн уонна Нерюнгри баһылыктара, 24 нэһилиэк баһылыга, оройуон уонна нэһилиэк 210 депутата талыллыахтара. Онуоха «Биир ньыгыл Россия» партия 100% кыттан, ситиһиилээх тахсыахтаах диэн олохтоох салаа сыал-сорук туруорда.

Дмитрий ОСИПОВ.