03 ноября 2017 в 10:01

Бюджет туһунан аһаҕас истиилэр

Саха Өрөспүүбүлүкэтин Ил Түмэнин спикерэ Александр Жирков алтынньы 27 к. 122 №-дээх дьаһалынан «Саха Өрөспүүбүлүкэтин 2018 сылга уонна кэлэр 2019-2020 сс. судаарыстыбаннай бюджетын туһунан» Саха Өрөспүүбүлүкэтин сокуонун барылын туһунан» тиэмэҕэ аһаҕас истии ыытыллар.

Аһаҕас истии Ил Түмэн бюджекка, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэтин киэҥ ыҥырыылаах мунньаҕын быһыытынан барыаҕа.
Сүрүн иһитиннэриини СӨ Бырабыыталыстыбатын бэрэссэдээтэлин бастакы солбуйааччы – экономика миниистирэ Михаил Осипов уонна үп миниистирэ Валерий Жондоров оҥоруохтара.
Тэрээһиҥҥэ парламент салалтата, норуот дьокутааттара, Бырабыыталыстыба чилиэннэрэ, министиэристибэлэр, биэдэмистибэлэр, улуустар, куораттааҕы уокуруктар бэрэстэбиитэллэрэ, уопсастыбаннас, суруналыыстар кыттыахтара.
Маннык истиини Ил Түмэн бюджекка, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэтэ бэрэссэдээтэл Юрий Николаев салалтатынан өрөспүүбүлүкэ үпкэ сүрүн докумуона хайдах буолуохтааҕын Саха сирин нэһилиэнньэтигэр иһитиннэрэр, тиэрдэр, ис хоһоонунун билиһиннэрэр соруктаах ыытар.
Бюджет туһунан истии сэтинньи 10 күнүгэр парламент 330 №-дээх мунньахтыыр саалатыгар 15 ч. ыытыллар.