11 декабря 2017 в 13:42

Муомаҕа цифровой ханааллары көрүөхтэрэ

Кэнники сылларга олохпутугар сибээс араас өҥөтө киирэн, сайдыы балысханнык барар. Улууска “Мегафон”, “МТС”, “Билайн” хампаанньалара холбоммуттара. РФ президенэ В.В. Путин дойду үрдүнэн цифровой технологияны күүскэ сайыннарар туһунан боппуруоһу көтөхпүтэ. Ол сорудаҕа туолан, Муомаҕа бу күннэргэ цифровой телевидение холбонно.

Сонун дьаһал олохтоохтору үөртэ.
«Российская телерадиосеть» тэрилтэ Уһук Илиннээҕи филиалын үлэһитэ Данил Николаев:

— Үлэ анал кыраапыгынан кэмигэр киирдэр ханнык диэн үлэлэһэбит. Саха сиригэр барыта 160 анал станция туруорулунна, онон 210 нэһилиэнньэлээх пууну цифровой ханаалынан хааччыйдыбыт. Манна Хабаровскайтан «Восточная строительная компания» ХЭТ үлэһиттэрэ 35 м вышканы туруордулар, киэһэ хойукка диэри сыбаарка үлэтин ыытан, билигин тас өттүн күрүөтүн оҥордулар. Вышката үрдүк, 10 км тиийэ радиустаах сири хабан, Хонууттан чугас Суон Тиит учаастагын уонна Буор Сыһыы нэһилиэгин олохтоохторо бу сибээһинэн туһаныахтара. 10 ханаал босхо көстөр. Кэнэҕэс өссө эбии 10 ханаалы, иккис мультиплексы аҕалан холбуохпут. Оччотугар барыта 20 ханаалы буор-босхо көрүөххүт. Билигин өссө үһүс мультиплексы туруорар туһунан үрдүкү таһымҥа кэпсэтии барар.
Бу ханааллары аныгылыы оҥоһуулаах кэнники көлүөнэ телевизордарга эрэ көрүөххэ сөп, онно анал программалаах. Билигин дьон үксүлэрэ урукку сыллардааҕы телевизордаахтар. Кинилэргэ DVB-T2 анал приемник-приставка ылалларыгар исписэлиистэр сүбэлииллэр.

“Индигиир уоттара” хаһыат корр.