882
15 января 2018 в 15:18
Тимир суол тутуута быйыл түмүктэниэн сөп
Уһук Илин сайдыытыгар министиэристибэ официальнай сайтыгар сурулларынан, 2018 сылга Томмот — Дьокуускай (Аллараа Бэстээх) тимир суолун тутуутун түмүктээһиҥҥэ 1,95 млрд солк. үп ыытыллыаҕа. Ити үп “2010-2020 сылларга Россия тырааныспарын ситимин сайдыыта” федеральнай тус сыаллаах бырагыраамаҕа угуллубута.
Билигин тутууну түмүктээһиҥҥэ анаан техническэй сорудаҕы оҥоруу үлэтэ барар, ол бигэргэннэҕинэ, саҥа генеральнай бэдэрээтчити быһаарыыга куонкурус биллэриллиэҕэ итиэннэ Томмот – Аллараа Бэстээх тимир суолун түмүктээһин болдьоҕо олохтонуоҕа.
Регион былаастара Россия тимир суолларын салалтатын кытта тимир суолу олоххо киллэриигэ тэрээһиннэри былаанныыллар.
Быйыл Томмот – Дьокуускай (Аллараа Бэстээх) тимир суол линиятын бастайааннай үлэҕэ киллэрии былааҥҥа баар. Билигин 439 км уһуннаах суол быстах режиминэн үлэлиир.
Санаттахха, Владивостокка Судаарыстыбаннай сэбиэт президиумун мунньаҕын түмүктэринэн РФ Президенэ Владимир Путин 2018 сыл кулун тутар 1 күнүгэр диэри РФ Бырабыыталыстыбатыгар Саха Өрөспүүбүлүкэтин толорор былааһын уорганнарын кытта Томмот – Дьокуускай (Аллараа Бэстээх) инвестиция бырайыагын олоххо киллэриини түмүктээһиҥҥэ дьаһаллары ылалларыгар сорудахтаабыта.
