Омук сириттэн үлэһиттэри тардыыга бобуу кэҥэтилиннэ

Быйыл экономикаҕа үлэ көрүҥнэрин испииһэгэр эбии тутуу комплекса уонна хайаҕа хостуур оҥорон таһаарыы киирдилэр. Ити туһунан бэнидиэнньиккэ буолбут брифиҥҥэ Нэһилиэнньэ дьарыктаах буолуутугар Судаарыстыбаннай кэмитиэт бэрэссэдээтэлэ Степан Москвитин иһитиннэрдэ.
«Билигин өрөспүүбүлүкэ сиригэр-уотугар хаһаайыстыбаннай үлэни ыытар хайаҕа хостуур бөдөҥ тэрилтэлэр СНГ-тан – Узбекистантан, Таджикистантан, Украинаттан, Молдавияттан гражданнары үлэҕэ тардар бырааптара суох буолар. Биһиги ааҕыыбытынан, хайаҕа хостуур секторга 2 тыһыынчаттан тахса үлэ миэстэтэ босхолонуоҕа, бу иннинэ онно сүнньүнэн Украина уонна Узбекистан гражданнара үлэлииллэрэ. Ити миэстэлэргэ олохтоох нэһилиэнньэ кэлиэҕэ», — диэтэ Степан Москвитин итиэннэ өрөспүүбүлүкэҕэ үлэ ырыынагын омук дойдуларыттан кэлээччилэр баһылыылларыттан көмүскүүр механизмнар үөскэтиллэллэрин бэлиэтээтэ.
Итини таһынан, дойду бары субъектарын ортотугар миграннарга анаан саамай үрдүк сыаналаах патент Саха сиригэр олохтоммута. 2017 сылга патент сыаната 8762 солк. буолла. СНГ дойдуларыттан киирээччи хас биирдии үлэһит иһин үлэ биэрээччи ый аайы Саха сирин бюджетыгар 8762 солк. төлүүр эбээһинэстээх.
Москвитин этэринэн, өрөспүүбүлүкэҕэ ыраах омук дойдуларыттан үлэһит күүһү квоталааһын кээмэйэ сыллата намтыыр. 2017 сылга барыта 338 квота бэриллибит. Тэҥниир буоллахха, 2017 сылга Приморскай кыраайга омук дойдуларыттан кэлээччилэргэ анаан 20 тыһ. кэриҥэ квота бэриллибит, Хабаровскай кыраайга – 12 тыһ. кэриҥэ, нэһилиэнньэтэ биһиэниниин араа-бараа Амурскай уобаласка – 5 тыһ. курдук.
2017 сылга хаһаайынныыр субъектар омук сирин гражданнарын экономическай үлэ 14 көрүҥэр патент төрүтүгэр үлэҕэ тардыыларыгар бобуу олохтоммута: үөрэх, доруобуйа харыстабылын, тырааныспар, эргиэн, балыктааһын уонна оҕуруот аһын үүннэрии эйгэлэригэр, хамсаабат баайы-дуолу кытта үлэҕэ.
Нэһилиэнньэ дьарыктаах буолуутун Судаарыстыбаннай кэмитиэтин ааҕыытынан, баһылык ыйааҕа дьайыытын түмүгэр 2017 сылга 500-тэн тахса үлэ миэстэтэ Саха сирин олохтоохторун туһатыгар босхоломмута.
2018 сылга ананар ыйаахха регион баһылыга Егор Борисов 2017 с. ахсынньы 29 к. илии баттаабыта. Манна экономическай үлэ көрүҥнэрин испииһэгэ кэҥиир. Ол курдук, сир анныттан туһалаах баайы хостооһун, таҥастааһын, тутуу бырайыактарын оҥоруу, дьиэни көтүрүү киирдилэр. Бу докумуоннар үлэ национальнай ырыынагын көмүскүүр, үлэтэ суох буолуу таһымын намтатар, бастакы уочаратынан Россия Федерациятын гражданнарын үлэҕэ ылыыга көмөлөһөр сыалтан илии баттаннылар.

Саха сирин Баһылыгын уонна
Бырабыыталыстыбатын пресс-сулууспата.