Ытыктабыллаах Саха сирин наукатын эйгэтин уонна үрдүк үөрэҕин үлэһиттэрэ!

Аныгы кэм ирдэбилигэр сөп түбэ­һиннэрэн, наука билиҥҥи ситиһиилэрэ олохпут бары эйгэтигэр тирэҕинэн, сайдыыны хамсатааччынан буолаллар. Наука, үөрэх кыаҕа экономика үрдүк уонна тэтимнээх үүнүүтүн, регион Уһук Илин, Россия уонна аан дойду таһымыгар тахсыытын хааччыйар.
Россия Наукаларын академиятын Сибиирдээҕи салаатын Саха сиринээҕи Научнай киинин, Саха Өрөспүүбүлүкэтин Наукаларын академиятын институттара, бу салаа тэрилтэлэрэ бастыҥ холобурга сылдьаллар. Саха сирин учуонайдара Россияҕа уонна омук сирдэригэр коллегаларын кытта бииргэ үлэлэһэллэр, уопут атастаһаллар. Регион олоҕор-дьаһаҕар сүҥкэн кылааты үрдүк үөрэх кыһалара, ол иһигэр М.К.Аммосов аатынан Хотугулуу-Илиҥҥи федеральнай университет киллэрэллэр. Наука бэрэстэбиитэллэрин чинчийэр үлэлэрэ инновационнай бырайыактар олоххо киириилэригэр төһүү буолаллар. Билиҥҥи кэмҥэ киһи хапытаалын бөҕөргөтүүгэ, цифровой экономиканы, үрдүк технологиялаах производствоны, IT-кластердары уонна да атын хайысхалары үөскэтиигэ научнай-техническэй базаны сайыннарыы ирдэнэр.
Саха Өрөспүүбүлүкэтин судаарыстыбаннай политикатыгар науканы өйөөһүн биир сүрүн соругунан буолар. Россия Наукаларын академиятын салалтатынан Саха сирин кэлимник чинчийэр иккис научнай экспедиция 2020 сылга диэри үс түһүмэҕинэн үлэни көҕүлүүр, тустаах судаарыстыбаннай бырагыраама олоххо киирэр.
Научнай-чинчийэр эйгэҕэ сокуоннары тупсарыыга, наука үлэһиттэрин өйөөһүҥҥэ утумнаах үлэ барар. Сахалартан бастакы академик В.П. Ларионов аатын үйэтитэн, 2009 сылтан бастыҥ научнай үлэлээх эдэр учуонайдарга Саха Өрөспүүбүлүкэтин Ил Түмэнин бириэмийэтэ туттарыллар. Быйыл олунньу 10 күнүгэр өрөспүүбүлүкэ уопсастыбаннаһа Владимир Петрович Ларионов төрөөбүтэ 80 сылын бэлиэтиир. Павел Мельников, Николай Черскэй, Гермоген Крымскай курдук Саха сирин наукатын аан дойдуга ааттаппыт академиктар ааттарынан, кинилэр төрүттээбит научнай оскуолаларынан киэн туттабыт.
Саха Өрөспүүбүлүкэтин Ил Түмэнэ наука эйгэтин бары үлэһиттэригэр кытаанах доруобуйаны, айымньылаах үлэни, саҥа арыйыылары, ситиһиилэри баҕарар.

Саха Өрөспүүбүлүкэтин Ил Түмэнэ.