Булчут ыт адьырҕаҕа хайдах утарылаһары билиэхтээх

Бу иннинэ, сокуон кыыллары утары ыттары таһааран эрчийиини боппута, мөккүөр үөскээбитэ. Федерация Сэбиэтэ сокуоҥҥа утары куоластаабыта, ону сэргэ сөбү­лэһиннэрэр хамыыһыйа тэриллибитэ.
«Хоту сиргэ олорор сүүнэ элбэх киһиэхэ булт идэлэринэн буолар. Биир өттүттэн, уустук уонна ыарахан идэ, атын өттүттэн – олус кутталлаах, ол эбэтэр ханнык баҕар түгэҥҥэ булчут кыылтан эчэйэн өлүөн сөп. Оччоҕуна киниэхэ көмөлөһөөччүтэ ыт буолуохтаах. Бастакытынан, ыт бултууругар көмөлөһөр, иккиһинэн, кинини көмүскүүр. Ол эрээри кини кыылы хаһан да көрбөтөх буоллаҕына, хайдах көмөлөһүөҕэй?», — диир Штыров.
Сенатор эппитинэн, Россия бары муннуктарыгар туһааннаах быраабылаларынан сирдэтинэн үлэлиир араас эрчийэр станциялар бааллар. Ол быраабылаларынан адьырҕа кыыллары кытта күөн көрсүү көҥүллэнэр.
«Ыты эһэҕэ бултуурга эрчийэр буоллахтарына, эрчийии кэмигэр эһэни кытта утары көрүһүннэрэллэр. Ол аата ыт адьырҕа кыыл суоһун-суодалын өйдүөхтээх итиэннэ онуоха хайдах утарылаһары уонна киниэхэ түһэри билиэхтээх. Манна быһаччы көрсүһүүтэ суох табыллыбат. Сокуон бастаан итинник эрчийиини толору бобор этэ», — диэн быһаарда Штыров.
Сокуон бүтэһик редакциятыгар, сөбүлэһиннэрэр хамыыһыйа үлэтин түмүгүнэн, ыттары кыылы кытта көрсүһүннэрэн эрчийии көҥүллэнэр. Ол эрэн итинник эрчийэр станциялар бултуур сирдэргэ баар буолуохтаахтар.