Депутаттар сэттис спартакиадалара

Спартакиада балаһыанньатынан, Саха сирин муниципальнай тэриллиилэриттэн олохтоох салайыныы бэрэстэбиитэллээх уорганнарын депутаттарын хамаандалара, ону сэргэ Ил Түмэн депутаттара кытталлар.
Бу күрэхтэһиилэр номнуо сэттис төгүлүн ыытыллаллар, хас сыл аайы хамаанда ахсаана улаатар. Ол курдук, быйыл Өлөөн эбэҥки национальнай оройуонун хамаандата эмиэ мэтээл иһин киирсиэҕэ, кинилэртэн Томпо оройуонун хамаандата хаалсыа суоҕа. 2013-2016 сылларга чөмпүйүөнүнэн Чурапчы улууһун сүүмэрдэммит хамаандата буолбута, оттон 2017 сылга Сунтаар улууһун оонньооччулара инники күөҥҥэ тахсыбыттара.
Быраабыла быһыытынан, VII Спартакиада кыттыылаахтара икки бөлөххө арахсаллар: 1-кы бөлөх — Арктикатааҕы уонна хотугу оройуоннартан ураты өрөспүүбүлүкэ бары муниципальнай тэриллиилэрэ уонна СӨ Судаарыстыбаннай Мунньаҕын (Ил Түмэн) хамаандата; 2-с бөлөх — Арктикатааҕы уонна хотугу оройуоннар, ол курдук Өлөөн, Үөһээ Дьааҥы, Эдьигээн, Кэбээйи, Муома улуустара, о.д.а.
1-кы бөлөххө хамаанда 11 киһиттэн турар, 2-с бөлөххө – 8 киһиттэн. VII Спартакиадаҕа 21 хамаанда кыттар, ол иһигэр 2017 сылтан саҕалаан күрэхтэһэр Ил Түмэн хамаандата. Онон волейболга, хамаанданан уһуну ыстаныыга, мээчиги кольцоҕа быраҕыыга, дартс көрүҥэр күүстээхтэр биллиэхтэрэ.
СӨ муниципальнай тэриллиилэрин олохтоох салайыныы бэрэстэбиитэллээх уорганнарын Ассоциацията бу күрэхтэһиилэри сүрүн тэрийээччинэн буолар. Быйыл депутаттар спортивнай күрэхтэрэ олохтоох салайыныы 15 сылын чиэһигэр уонна Кореяҕа Олимпийскай оонньууларга “Россия олимпийскай атлеттарын” өйөөн ыытыллар.
Күрэхтэһиини төрүттэспит, өрөспүүбүлүкэ депутаттарын Спартакиадатын тэрийэр кэмитиэтин бэрэссэдээтэлэ, өрөспүүбүлүкэ бэрэстэбиитэллээх уорганнарын Ассоциациятын бэрэссэдээтэлэ, Дьокуускай куорат Думатын Бэрэссэдээтэлэ Александр Саввинов санаатын үллэһиннэ:
«Биһиги сокуону көҕүлүүрү, нуормалары айары эрэ сатыыр буолбатахпытын тус бэйэбит холобурбутунан көрдөрүөх тустаахпыт. Спорка күрэхтэр күүстээхтэри, сымсалары буларга саамай бастыҥ уонна эрэллээх ньымалартан биирдэстэрэ буолалларын ааһан, бэйэ-бэйэни үчүгэйдик билсэргэ, түмсэргэ көмөлөөхтөр. Сылтан сыл аайы Саха сирин депутаттарын Спартакиадатыгар кыттааччылар географиялара кэҥээн иһэр итиэннэ биһиги Спартакиадабыт муниципальнай уопсастыбаҕа улахан суолталааҕын дакаастаата».
Спорт бырааһынньыгын сыала-соруга: олохтоох салайыныы бэрэстэбиитэллээх уорганнарын депутаттарын ортотугар чөл олоҕу сырдатыы уонна тарҕатыы. Маннык күрэхтэр чахчы да өрөспүүбүлүкэ депутаттарын куорпуһун сомоҕолуулларын, бэйэ-бэйэни үчүгэйдик билэргэ итиэннэ бэйэ күүһүн-уоҕун тургутарга, “хаалтыһа суох” дэнэр олох түгэннэригэр киһи быһыытын-майгытын көрдөрөргө кыаҕы үөскэтэллэрин Спартакиада дакаастаабыта номнуо ыраатта.
Бу күрэхтэһиилэр икки күн, олунньу 23-24 күннэригэр буолуохтара. Бириистээх миэстэни ылбыттар грамоталарынан, мэтээллэринэн наҕараадаланыахтара. Оттон кыайыылаах хамаанда көһө сылдьар Кубогы тутуоҕа.