Александр Афанасьевич Романов туһунан сырдык өйдөбүл

Александр Афанасьевич Саха АССР Мэҥэ Хаҥалас оройуонун Майа сэлиэнньэтигэр 1963 сыл балаҕан ыйын 18 күнүгэр  төрөөбүтэ. Кини Саха судаарыстыбаннай университетын «промышленнай уонна гражданскай тутуу» салаатыгар үөрэнэн, тутуу инженерин идэтин баһылаабыта уонна олоҕун бүтүннүүтүн тутуу эйгэтигэр анаабыта. Дьиэ тутааччы маастарын үлэтиттэн саҕалаан, өрөспүүбүлүкэ архитектуратын уонна тутуу холбоһугун  миниистирин бастакы солбуйааччытыгар тиийэ үүммүтэ, бэриниилээхтик, таһаарыылаахтык үлэлээбитэ.
2013 сыллаахха Александр Афанасьевич Романов бар дьонун итэҕэлин ылан, Саха Өрөспүүбүлүкэтин Ил Түмэнин  дьокутаатынан  талыллыбыта. Парламент үлэтин биир бөдөҥ салаатын – тутууну уонна дьиэ-уот-коммунальнай хаһаайыстыбатын сүрүннүүр сис кэмитиэти салайбыта. Кини тутуу эйгэтигэр элбэх сыратын-сылбатын, күүһүн-уоҕун биэрбит, үгүс опыттаах, дириҥ билиилээх, судаарыстыбаннай таһымнаах өрөспүүбүлүкэ биир бастыҥ салайааччыта этэ. Үлэлээбит үөрүйэҕэр, сатабылыгар  олоҕуран, Саха сиригэр  саҥа хайысханы – тыа сиригэр аныгылыы тупсаҕай оҥоһуулаах дьиэ-уот тутуутун тэрийиини көҕүлээбитэ. Төһө да түбүктээх үлэҕэ сырыттар, Александр Афанасьевич салайар кэмитиэтин сүрүн үлэтинэн эрэ муҥурдамматаҕа, ырааҕы-киэҥи өтө көрөр, ырытар ураты дьоҕурдааҕа, норуот хаһаайыстыбатын уонна тутуу сайдыытын тирээн турар соруктарын биир кэлимник ситимнээн көрөрө.
Өрөспүүбүлүкэ тутуутун уонна архитектуратын эйгэтигэр сокуону оҥорор, түмэр үлэни утумнаахтык ыыппыта, дьиэ-уот-коммунальнай хаһаайыстыбатын уларытан, саҥардан тэрийиини көҕүлээччилэртэн биирдэстэрэ этэ.  Биир идэлээхтэригэр, парламент атын сис кэмитиэттэрин бэрэссэдээтэллэригэр, Саха Өрөспүүбүлүкэтин Ил Түмэнин,  Бырабыыталыстыбатын салалтатыгар үгүс хайысхаҕа үтүө сүбэһит буолара.
Александр Афанасьевич ураты көрүүлээх бырайыактары, саҕалааһыннары, Саха сирин  куораттарыгар,  улуустарыгар 80-тан тахса кэрэ көстүүлээх, үйэлээх тутуулары хаалларда. Төрөөбүт нэһилиэгэ, улууһа, үөрэммит оскуолата, кыһата — М.К. Аммосов аатынан Хотугулуу-Илиҥҥи федеральнай университет, доҕотторо, биир идэлээхтэрэ – кинини билэр, алтыспыт дьон бука бары бу эр санаалаах, чаҕылхай, дьоҥҥо-сэргэҕэ аһаҕас, элэккэй сыһыаннаах Александр Афанасьевиһы өйдүү-саныы сылдьыахтара, кининэн киэн туттуохтара.
Үтүө киһи сырдык кэриэһигэр анаммыт чугас дьонун, доҕотторун, биир идэлээхтэрин ахтыылара түмүллүбүт кинигэ «Саха киэн туттар дьоно» сериянан бэчээттэннэ. Александр Афанасьевич бэйэтэ тэрийбит дуобакка, саахымакка турнира быйыл бэйэтин аатынан ыытылынна.
А.А. Романов төрөөбүт норуотун, дойдутун туһугар анаммыт олоҕо бар дьонугар, биһиги сүрэхпитигэр умнуллуо суоҕа, бигэ тыллаах, булгуруйбат сүрүннээх, далааһыннаах салайааччы быһыытынан үтүө өйдөбүл дьонугар-сэргэтигэр мэлдьи хаалыаҕа.