15 июня 2018 в 14:23

Татарстан, Хакасия уонна Саха сирин парламеннара сөбүлэһии түһэрсиэхтэрэ

Бэс ыйын 21 - 24 күннэригэр Саха Өрөспүүбүлүкэтигэр Татарстан Судаарыстыбаннай Сэбиэтин уонна Хакасия Үрдүкү Сэбиэтин итиэннэ Иркутскай уобалас парламенын делегациялара кэлэллэрэ былааннанар.

Ол курдук, делегация састаабыгар Татарстан Өрөспүүбүлүкэтин Судаарыстыбаннай Сэбиэтин Бэрэссэдээтэлэ Фарид Мухаметшин, солбуйааччыта Татьяна Ларионова, дьокутаат Ирек Шарипов уонна да атыттар бааллар. Хакасияттан Үрдүкү Сэбиэт Бэрэссэдээтэлэ Владимир Штыгашев, бүддьүөт уонна нолуок кэмитиэтин бэрэссэдээтэлэ Сергей Комаров, Үрдүкү Сэбиэт аппаратын салайааччыта Нина Шейерман кэлэллэр. Оттон Иркутскай уобалас делегациятын спикер Сергей Брилка салайар.

Бу сырыы сүрүн сыалынан парламеннар бииргэ үлэлэһиигэ Ил Түмэни кытта сөбүлэһии түһэрсиэхтэрэ.

Бэс ыйын 22 күнүгэр делегациялар Дьокуускайга Кыайыы болуоссатын мемориальнай комплексыгар сибэкки дьөрбөтүн ууруохтара.

Салгыы Ил Түмэҥҥэ спикер Александр Жиркову кытта көрсүөхтэрэ.

Бэс ыйын 23 күнүгэр ыалдьыттар Япония уонна Россия парламентарийдарын бииргэ үлэлээһиннэригэр анаммыт улахан мунньахха кыттыыны ылыахтара.

Бу күн Татарстантан, Хакасияттан, Иркутскайтан кэлбит делегациялар самаан сайыны көрсөр Туймаада ыһыаҕын арыллыытын сиэрин-туомун көрүөхтэрэ.

Маннык уруулуу өрөспүүбүлүкэлэри кытта доҕордуу сыһыан, бииргэ үлэлэһии, уопут атастаһыы үтүө өрүттээх, таһаарыылаах буолуо диэн эрэнэбит.