Кэмитиэт түмүк мунньаҕын ыытта

Елена Христофоровна кэмитиэт грамоталарын уонна махтал суруктарын ситэриилээх былаас уорганнарын салайааччыларыгар, норуот депутаттарыгар, Ил Түмэн аппараатын үлэһиттэригэр, уопсастыбанньыктарга туттарда. “Бу сыллар тухары бары биир хамаанда курдук ситимнээхтик үлэлээтибит. Сокуону оҥорор уустук үлэбитигэр бары бэйэҕит кылааккытын киллэрдигит. Эһиги көмөҕүтүнэн аҕыйах ахсааннаах хотугу норуоттар бырааптарын көмүскүүр кэккэ сокуоннар оҥоһуллан тахсыбыттара”, — диэн мустубут дьоҥҥо махтал тылларын эттэ.

Ил Түмэн Бэрэссэдээтэлин солбуйааччы Виктор Губарев  депутат хотугу сир олохтоохторун интэриэстэрин уонна бырааптарын өрөспүүбүлүкэ таһымыгар эрэ буолбакка, федеральнай  таһымҥа туруулаһарын ыйда. “Елена Христофоровнаны Госдумаҕа билэллэр уонна сыаналыыллар, тоҕо диэтэххэ, депутат дойдутун туһугар ис сүрэҕиттэн долгуйарын, кыһалларын билэллэр”, — диэтэ. Кини инникитин да кэмитиэти үгүс үлэ күүтэрин санатта. “Арктика сайдыытын туһунан федеральнай бырагыраама сүнньүнэн үлэлэр, чуолаан аэропорду сайыннарыы, хотугу улуустарга таһаҕас тиэйиитэ, оҕуруот аһын  хааччыйыы боппуруостара тураллар. Елена Голомарева хотугу уонна Арктика оройуоннарыгар айан суолун сыаната үрдүгүн боппуруоһунан үлэлэспитэ. Мин Елена Христофоровна аныгыскы ыҥырыыга эмиэ салгыы үлэлииригэр баҕарабын”, — диэтэ.

Ыспыраапка
Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар Ил Түмэн сис кэмитиэтэ 5-с ыҥырыыга хотугу уонна Арктика оройуоннарын уонна аҕыйах ахсааннаах хотугу норуоттар интэриэстэрин, бырааптарын көмүскүүр 167 боппуруос тула үлэлээбит. 19 Саха Өрөспүүбүлүкэтин сокуонун дьүүллэспиттэр, 15 СӨ сокуонун ылынарга быһаарбыттар, ол иһигэр биирэ сүрүн (базовый) сокуонунан буолар. 47 Саха Өрөспүүбүлүкэтин парламенын уурааҕа бигэргэммит, 8 федеральнай сокуон барылынан этиилэри киллэрбиттэр.

СӨ үөрэҕин уонна наукаҕа миниистирин солбуйааччы Феодосия Габышева кэмитиэт көдьүүстээх үлэтин бэлиэтээтэ. “Елена Голомарева үөрэх систиэмэтигэр үлэлии сылдьан депутат буолбута. 2012 сыллаахха “РФ үөрэҕин туһунан” сокуон ылынылларын саҕана төрөөбүт тылы көмүскээһиҥҥэ улахан үлэни оҥорбуппут”, — диэн ахтан ааста. Кини Елена Христофоровнаҕа салгыы быыбарданан үлэлииригэр баҕарда. “Былырыын күһүн Санкт-Петербурга буолбут Бүтүн Арассыыйатааҕы төрөөбүт тыл уонна литература учууталларын уонна Хоту сир, Сибиир, Уһук Илин аҕыйах ахсааннаах норуоттарын култуураларын сийиэһигэр кыттыыга Елена Христофоровна улахан өҥөлөөх. Сийиэс резолюциятыгар киирбит этиилэри толорор соруктаахпыт, бу биһигини инникитин күүтэр үлэлэр. Онон Елена Христофоровна салгыы депутаттар корпустарыгар үлэлиэҕэр эрэнэбин”, — диэтэ.

М.Е.Погодаев аатынан төрүт-уус община баһылыга Мария Погодаева: “САССР Үрдүкү Сэбиэтин XII ыҥырыытын сис кэмитиэтин бэрэссэдээтэлинэн үлэлээбитим, онтон ыла мин бэлиэтээһимминэн, бу кэмитиэккэ саамай элбэҕи оҥорбут Елена Христофоровна буолар. Хотугу аҕыйах ахсааннаах норуоттар интэриэстэрин дьаныһан туран туруорсар. Кини үлэлиирин саҕана көс дьиэ кэргэн уонна көс оскуола туһунан өрөспүүбүлүкэ сокуоннара ылыныллыбыттарын бэлиэтиэм этэ”, — диэтэ.  Кини: “Биир көлүүргэ баар ыттары басхан ыт тардарын курдук, Елена Христофоровна барыбытын сүрүннээн, салайан илдьэ сылдьар”, — диэн этиитин кытары бары сөбүлэстилэр.

Маны таһынан кэмитиэт бэрэссэдээтэлигэр бу курдук үтүө тыллары ХИФУ Арктикаҕа быраап кафедратын сэбиэдиссэйэ Анатолий Слепцов, Саха сирин аҕыйах ахсааннаах норуоттарын Ассоциациятын кырдьаҕастарын сүбэтин бэрэссэдээтэлэ Августа Марфусалова, СӨ долганнарын сэбиэтин бэрэссэдээтэлэ Елена Тимофеева эттилэр.