Устудьуоннар Өлүөнэ арыытыгар сайыны атаарыахтара

От ыйын 4 күнүгэр техникум 5 устудьуона хаһаайыстыбаҕа от үлэтигэр көмөлөһө айаннаата. Оттон атырдьах ыйыттан техникум механизацияламмыт биригээдэтин иккис бөлөҕүн устудьуоннара от үлэтигэр тардыллыахтара. Былаан быһыытынан, устудьуоннар биригээдэлэрэ 600 туонна оту бэлэмниэхтээх. СӨ тыа хаһаайыстыбатыгар миниистирин э.т. Александр Атласов окко тахсар устудьуоннарга ситиһиилэри баҕарда, былааннарын толороллоругар эрэнэрин биллэрдэ.

“Бүгүҥҥү күҥҥэ оройуоннарга барыларыгар от үлэтигэр бэлэмнэнии күргүөмнээхтик бара турар. Өрөспүүбүлүкэ хас да хаһаайыстыбата номнуо от ыйын 1 күнүттэн оттооһун хампаанньатыгар киирдэ. Өрөспүүбүлүкэ тыатын хаһаайыстыбатыгар ынах сүөһү, сылгы кыһыны этэҥҥэ туорууругар анаан 492 033 туонна оту, 11 183 туонна сенаһы, 22 171 туонна сиилэһи бэлэмниэхтээхпит. Сүөһү аһылыгын бэлэмниир хампаанньаҕа хаһаайыстыбалар бары көрүҥнэригэр 10 ты­һыынчаттан тахса звено, 11 457 араас мааркалаах трактор, ону тэҥэ 40-ча тыһыынча киһи кыттара былааннанар. Ааспыт сылга от тиийбэтэх балаһыанньата хатыламматын туһугар, бу тэриллибит биригээдэлэр сүөһү аһылыгын бэлэмнээһиҥҥэ былааннаах сорудахтары толоруохтарыгар эрэнэбит”, — диэн бэлиэтээтэ Атласов.

Оттон ити техникум механизацияламмыт биригээдэтигэр “Тыа хаһаайыстыбатын механизацията” идэҕэ үөрэнэр үһүс куурус устудьуоннара киирдилэр. Кинилэр итиннэ тиритэ-хорута үлэлээн практикаларын барыахтаахтар. Устудьуоннар биригээдэлэрин ДьТХТ производственнай үөрэтиигэ маастара Иван Никандрович Исаков салайар, ону сэргэ кинилэри тракторист Геннадий Иванович Ломакин техниканы кытта үлэ мындырдарыгар уһуйуоҕа.

От үлэтигэр таһаарыллар массыына-тыраахтар паарката биэс МТЗ-82 трактортан уонна “Синтай” мини-трактортан турар. Техникалара барыта от үлэтигэр наадалаах агрегаттарынан хааччыллыбыт: икки роторнай от охсор, 2 пресс-подборщик уонна 2 трактор кыраабыла баар.

Устудьуоннар оһоҕунан ититиллэр уонна электрическэй генераторынан хааччыллыбыт анал балааккаларга олоруохтара. Тыа хаһаайыстыбатын техникумун салалтата оҕолору итии аһылыгынан хааччыйар, нэдиэлэҕэ иккитэ аһылык бородуукталарын уонна наадалаах тээбириннэри тиэйиэхтэрэ.

Уолаттар производственнай практикаҕа олус эппиэтинэстээхтик уонна үтүө суобастаахтык сыһыаннаһаллар. Кинилэр бэлиэтииллэринэн, үлэттэн чаҕыйбаттар, ол курдук оҕо саастарыттан оттооһуну билэллэр. Ол эрээри урукку үөрүйэхтэрин таһынан, манна кинилэр механизацияламмыт техниканы кытта үлэлээн, үөрэххэ ылбыт билиилэрин туһаныахтара.