379
20 июля 2018 в 12:29
Сөмөлүөккэ табахтыыр ночооттоох буолуон сөп
Мантан инньэ салгын аалынан көтөөччүлэр кириэһилэ курун баанартан аккаастанар эбэтэр бобуллар кэмҥэ кириэһилэлэр икки ардыларыгар “күүлэйдиир” түгэннэригэр, ону сэргэ табахтыылларын иһин 20-тэн 40 тыһыынчаҕа диэри ыстараабы төлүөхтэрэ. Бырабыыталыстыбаҕа ааҕалларынан, сөмөлүөккэ хаартыскаҕа түһэрии, видеоҕа устуу быраабылаларын кэһии, ону тэҥэ мобильнай төлөпүөннэри туһаныы иһин ыстарааптары 100-тэн 1000 солк. диэри улаатыннарар наадалаах.
Госдума судаарыстыбаннай тутууга кэмитиэтигэр сокуон барылын көрүү кэмигэр РФ юстицияҕа миниистирин солбуйааччы Юрий Любимов эппитинэн, экипаж ирдээбитигэр, пассажир төлөпүөнү туттартан аккаастамматаҕына, кини мобильнайын былдьаан ылыахтара суоҕа. Докумуону иккис ааҕыыга ити нуорманы сотуохтарыгар эрэл баар.
Оттон көтөр састаапка накаастабыллар, төттөрүтүн, күүһүрүөхтэрин сөп. Сокуон барылыгар этиллэринэн, хамандыыр холуочук штурвалга олорорун көрдөхтөрүнэ эбэтэр бэйэтин миэстэтигэр иккис пилоттан ураты кими эрэ олортоҕуна, ыстараап суумата 50 тыһ. солк. тэҥнэһиэҕэ. Лүөччүктэри икки-үс сылга бырааптарын быһар туһунан билигин үлэлиир быраабыла хаалыаҕа.
Госдума судаарыстыбаннай тутууга уонна сокуону оҥорууга кэмитиэтин бэрэссэдээтэлин бастакы солбуйааччы Вячеслав Лысаков “Парламент хаһыатыгар” быһаарбытынан, сокуоҥҥа баар итэҕэстэри туоратыах тустаахтар. “Кимиэхэ эрэ холуобунай болдьоҕу аныыллара, оттон кыра күлүгээннэр кэппиэйкэлээх ыстарааптары төлүүллэрэ мэлдьи салҕанара табыллыбат. Маныаха кинилэр быһыылара-майгылара, биллэн турар, эмиэ содуллаах буолуон сөп”, — диэн бэлиэтээтэ депутат.
Кини санаппытынан, сөмөлүөккэ “айдааны тардааччылар” холуобунай эппиэтинэстэрин туһунан 2017 сыл муус устар 15 к. күүһүгэр киирбит сокуон ситиһиилээхтик үлэлиир – тырааныспар куттала суох үлэлииригэр суоһуур дьайыыларын иһин гражданин 5 сылга диэри түрмэ болдьоҕор түбэһиэн сөп. Оттон эрдэттэн сүбэлэһэн баран, бөлөх дьон сууну тардыбыт эбэтэр кини кыттыылаахтара былаас бэрэстэбиитэлигэр өрөлөспүт буоллахтарына, муҥутуур накаастабыл номнуо 8 сыл буолуоҕа.
