Оонньуулар түмүктэннилэр

Бу наукаҕа бөдөҥ бэлиэ түгэн түмүктэрин таһаарыыга СӨ Ил Түмэнин Бэрэссэдээтэлэ Александр Жирков, СӨ Конституционнай суутун Бэрэссэдээтэлэ Александр Ким-Кимэн, СӨ Бырабыыталыстыбатын Бэрэссэдээтэлин э.т. Владимир Солодов, Саха сирин бастакы Президенэ, Судаарыстыбаннай сүбэһит Михаил Николаев, Россия Үөрэххэ министиэристибэтин уопсай үөрэхтээһин эйгэтигэр судаарыстыба политикатын департаменын баһылыга Андрей Петров, СӨ Бырабыыталыстыбатын Бэрэссэдээтэлин солбуйааччы э.т. Ольга Балабкина, СӨ үөрэххэ уонна наукаҕа миниистирэ Владимир Егоров, Норуоттар икки ардыларынааҕы интеллектуальнай оонньуулар Бырагыраамаларын кэмитиэтин бэрэссэдээтэлэ, Сингапур Национальнай университетын профессора Леонг Чуан Квек, «Майтона» хампаанньа президенэ Александра Баишева, о.д.а. кытыннылар.

Саха сирин Бырабыыталыстыбатын Бэрэссэдээтэлин э.т. Владимир Солодов буолан ааспыт Оонньуулар региоҥҥа хаһааҥҥытааҕар да улахан суолталаммыттарын бэлиэтээтэ.

Премьер-миниистир э.т.  I Норуоттар икки ардыларынааҕы интеллектуальнай оонньуулар уопсай зачеттарыгар кыайыылааҕынан Сингапур Национальнай университетын  иһинэн  математика уонна наука оскуолатын хамаандатын биллэрдэ уонна оонньуулар Улахан Кубоктарын туттарда. Бу Кубок кыайыылааҕа биэс дисциплина түмүктэринэн куонкуруска быһаарылынна. Барыта 151 оскуола “Туймаада” олимпиадаҕа, «Science Fair» научнай конференция-куонкуруска, 3D-моделированиеҕа, Хакатоҥҥа уонна «Роботтар оонньууларыгар» күрэхтэстэ. Сингапур Национальнай университетын иһинэн оскуола 13 үөрэнээччититтэн турар хамаанда биэс миэстэттэн 3 бастакы миэстэни ылан, Норуоттар икки ардыларынааҕы интеллектуальнай оонньуулар Кубоктарын хаһаайына буолла.

«Yakutsk International Science Fair» Норуоттар икки ардыларынааҕы научнай конференция-куонкурус түмүктэринэн Гран-прины Казахстан хамаандатыттан Назарбаев физико-математическай интеллектуальнай оскуолатын үөрэнээччитэ Нурдаулет Таумергенов ылла. Оскуола оҕото конференцияҕа GloveSpeaker бэрчээккэ көмөтүнэн хамсаныы тылынан киһи саҥатын таһаарыыга бэйэтин бырайыагын билиһиннэрдэ. Кини айбыт үлэтэ кыайан саҥарбат дьон саҥарар дьону кытта улахан уустуга суох кэпсэтэллэригэр көмөлөһүөҕэ. АХШ 5 тыһыынча доллардаах сертификатын кыайыылаах оҕоҕо Норуоттар икки ардыларынааҕы интеллектуальнай оонньуулар Бырагыраамаларын кэмитиэтин бэрэссэдээтэлэ, Сингапур Национальнай университетын профессора Леонг Чуан Квек уонна «Майтона» хампаанньа президенэ Александра Баишева туттардылар.

Саха сиригэр тэриллибит Норуоттар икки ардыларынааҕы интеллектуальнай оонньуулар кыттыылаахтарын наукаҕа улахан күрэх түмүктэммитинэн Норуоттар икки ардыларынааҕы космическай станцияттан космонавтар Олег Артемьев уонна Сергей Прокопьев эҕэрдэлээтилэр. Кинилэр Саха сиригэр саҕаламмыт доҕордоһуу кэнэҕэс булгуччу салҕанарыгар эрэллээхтэрин биллэрдилэр.

Россия Үөрэххэ министиэристибэтин уопсай үөрэхтээһин эйгэтигэр судаарыстыба политикатын департаменын баһылыга Андрей Петров этэринэн, Оонньуулар куонкурустарын 50-ча кыайыылаахтара “Океан” уонна “Орленок” оҕо кииннэригэр барыахтара. «Бу форум хас да дойду ыччатын уонна преподавателлэрин түмтэ, Дьокуускайы интеллектуальнай олох киининэн көрдөрдө. Бу саҕалааһын улахан кэскиллээх”, — диэн бэлиэтээтэ кини.

Өрөспүүбүлүкэ үөрэххэ уонна наукаҕа миниистирэ Владимир Егоров Саха сирин үөрэнээччилэрин ситиһиитин ураты тутан бэлиэтээтэ: «В.П. Ларионов аатынан физико-техническэй оскуола уопсай хамаанданан зачекка төрдүс миэстэни ылла. Биэс хайысхаҕа бириистээх миэстэлэргэ тиксибиттэр ортолоругар биһиги элбэх оскуолабыт баар».