Сокуон ылылынна

Сокуону ылыныы иһин 332 парламентарий куоластаата

Бастакы ааҕыыга сокуон барыла от ыйын 19 к. ылыныллыбыта, иккискэ – балаҕан ыйын 26 к.

Пенсия сокуонун тупсарыыга нуормалар олоххо киириилэригэр Госдума салгыы мониторины ыытыаҕа. Бу иннинэ ГД Бэрэссэдээтэлэ Вячеслав Володин бэлиэтээбитинэн, сокуоннар пенсияҕа сыһыаннаах пакеттарын ылыныы кэнниттэн «оробуочай бөлөх пенсия сокуоннарын тупсарыынан салгыы дьарыктаныаҕа уонна олоххо туһаныллыытын үөрэтиэҕэ, ылыллыбыт сокуоннар көдьүүстээхтик, түмүктээхтик үлэлииллэрин туһугар гражданнары кытта сибээһи тутуһуоҕа».

Санатан эттэххэ, икки ыйтан ордук кэмҥэ – балаҕан ыйын 24 к. диэри – сокуон барылыгар этиилэр уонна көннөрүүлэр ыытыллыбыттара. Атырдьах ыйын 21 к. Госдума пенсия сокуоннарын тупсарыы боппуруостарыгар киэҥ ыҥырыылаах истиилэри ыыппыта, онно 600-тэн тахса киһи кыттыбыта. Сокуон барылыгар үлэлиир бөлөх тэриллибитэ, онно депутаттартан ураты, бырабыыталыстыба, дьыалабыай эргимтэ уонна предпринимателлэр уопсастыбаларын бэрэстэбиитэллэрэ, идэлээх сойуустар лидердэрэ, экспердэр уонна уопсастыбаннас бэрэстэбиитэллэрэ кыттыбыттара.

Сокуон барылыгар 324 көннөрүү киирбитэ, онтон 9-һун РФ Президенэ Владимир Путин киллэрбит. Госдума Бэрэссэдээтэлэ Вячеслав Володин этэринэн, ити көннөрүүлэр сокуон “арыый социальнай хайысхалаах уонна сиэрдээх” буоларын хааччыйбыттара. Депутаттар көннөрүүлэри ылынарга биир санаанан куоластаатылар.

Госдума Бэрэссэдээтэлин тылыгар сигэннэххэ, сокуон сүрүн соруга – пенсиялаах дьон олоҕун уйгутун улаатыннарыы уонна пенсия үүнүүтүн хааччыйыы, ол курдук, орто пенсия 20-25 тыһ. солк. кыра буолуо суохтаах.

«Кинилэр кээмэйдэрэ хамнас 40% кырата суох буоларын туһугар, инфляция таһымыттан пенсия үрдээһинин хааччыйар быһаарыы наадалаах. Ити соруктары быһаарыыга туруктаах уонна көдьүүстээх пенсия систематын үөскэтии ирдэнэр», — диэбитэ кини.

“Биир  ньыгыл Россия” фракциятын салайааччы бастакы солбуйааччыта Андрей Исаев уопсастыбаҕа киэҥник дьүүллэһии кэнниттэн, сүнньүнэн РФ Президенэ көннөрүүлэри киллэрбитинэн, сокуон балайда уларыйда, диэн санаалаах.

«Быыһык кэмҥэ анаан страховой механизмнар үөскээтилэр, туһааннаах ыстаастаах итиэннэ штаты сарбыйыы түмүгэр үлэлэриттэн ууратыллыбыт дьон пенсияҕа болдьоҕун иннинэ тахсалларыгар кыах баар буолла. Нэһилиэнньэ дьарыктаах буолуутун туһунан сокуоҥҥа уларытыыларынан, пенсияҕа тахсыан иннинээҕи саастаах дьоҥҥо үлэтэ суох буолууга көмө харчы үс төгүл улаатар буолла. Кэккэ быһаарыылар, биһиги көрүүбүтүгэр, пенсия тиһигин саҥа параметрдарыгар көһүүнү сымнатар кыахтаахтар», — диэн бэлиэтээтэ Андрей Исаев.

Президент этии киллэрбит уларытыыларын ортотугар бааллар:

— Бырабыыталыстыба этиитинэн, дьахталлар пенсияҕа 8 сылынан хойутаан тахсалларын оннугар пенсияҕа тахсар саастарын — 63-тэн 60-ҥа диэри намтатыы.

— Элбэх оҕолоох ийэлэр пенсияҕа болдьоҕун иннинэ тахсыылара – үс оҕолоох дьахтар пенсияҕа болдьоҕун 3 сыл иннинэ тахсар кыахтанар, түөрт оҕолоох – 4 сыл иннинэ, 5 уонна онтон элбэх оҕолоох – 50 сааһыгар.

— Пенсияны сыл аҥаарын иннинэ анатар кыах – бырабыыталыстыба сокуонун барылынан киһи пенсияҕа 2020 сыл тохсунньутугар тахсыахтаах буоллаҕына, кини ону 2019 сыл от ыйыгар анатыан сөп.

— Пенсияҕа тахсыан иннинээҕи саастаах дьон үлэтэ суох буолууларыгар көмө харчы муҥутуур кээмэйин 4900 солкуобайтан 11280 солк. диэри улаатыннарыы.

— Пенсияҕа болдьоҕун иннинэ тахсыыга быраабы биэрэр ыстааһы сарбыйыы – дьахталларга 37 сылга уонна эр дьоҥҥо 42 сылга диэри.

— Тыа сиригэр олорор үлэлээбэт пенсионердарга пенсияларыгар 25% эбии харчыны төлөөһүн.

— Кырдьаҕаһынан пенсиялаахтарга пенсия индексацияланар – 2019 сыл тохсунньу 1 күнүттэн саҕалаан уонна 2024 сылынан түмүктээн, пенсияны индексациялааһын тохсунньу 1 күнүттэн (уруккута олунньу 1 күнүттэн этэ) оҥоһуллар. Сыллааҕы индексация пенсия кээмэйин ортотунан 1000 солк. улаатыннарар кыахтаах. 2024 сыл кэнниттэн пенсияны индексациялааһын сылга иккитэ оҥоһуллуоҕа, кини инфляцияттан үрдүк буолара сабаҕаланар.

Кэккэ көннөрүүлэри Госдума депутаттара уонна Федерация Сэбиэтин чилиэннэрэ киллэрдилэр.

Госдума официальнай сайтыттан