Уһук Илинтэн сылы эргиччи — субсидиянан

«Чуолаан, субсидияланар маршруттар кэрискэлэрин кэҥэтии, ити маршруттарынан сылы эргиччи субсидиялааһын (уруккута кулун тутар 1 күнүттэн ахсынньы 1 күнүгэр диэри тиэйиилэр субсидияланаллара), субсидияланар маршруттарынан тиэйии өҥөтүнэн туһанар кыахтаах гражданнар категорияларыгар элбэх оҕолоох дьиэ кэргэттэри киллэрии көрүллэллэр», — диэн федеральнай бырабыыталыстыба сайтыгар бэлиэтэнэр.

Нэһилиэнньэҕэ салгынынан тиэйии тии­һимньилээх буолуутун хааччыйыыга анаан федеральнай бюджеттан салгын тырааныспарын тэрилтэлэригэр субсидиялары биэрии Быраабылаларыгар уларытыыларынан Уһук Илинтэн уонна онтон төттөрү туһаайыыга авиациянан тиэйии субсидияланар маршруттарын кэрискэтин 73-тэн 152 маршрукка диэри кэҥэтии олохтонор.

“Якутия” авиахампаанньа – Уһук Илин олохтоохторун субсидияланар тиэйиигэ судаарыстыбаннай социальнай бырагыраама биир саамай актыыбынай кыттааччыта.  2017 сылга «Якутия» хампаанньа авиациянан тиэйии субсидияланар бырагырааматын 14 туһаайыыга толорбута, субсидияламмыт тарифтарынан 59 486 киһи туһаммыта, быйылгы сыл 10 ыйыгар – 64 799 киһи.

Уһук Илинтэн пассажирдарга салгынынан тиэйии тииһимньилээх буолуутун хааччыйар сыалтан, ити бырагыраама чэрчитинэн, «Якутия» авиахампаанньа анал чэпчэтиилээх тарифтарынан РФ гражданнарын маннык категорияларын тиэйэр:

— 23 сааһыгар диэри ыччат;

— 55-тэн үөһэ саастаах дьахталлар;

— 60-тан үөһэ саастаах эр дьон;

— 1-кы группалаах инбэлииттэр, сааһыттан тутулуга суох;

— 2-с уонна 3-с группалаах оҕо саастарыттан инбэлиит дьон;

— 1-кы группалаах инбэлииттэри арыаллыыр гражданнар;

— инбэлиит-оҕолору арыаллыыр  гражданнар;

— Бүтүн Россиятааҕы “Океан” Оҕо киинигэр путевкалаах 18-гар диэри саастаах оҕолор.

Ити саҥаны киллэрии олохтоммут көрүҥнээх туһааннаах докумуоннардаах элбэх оҕолоох дьиэ кэргэттэр чилиэннэригэр сыһыаннаах.

Пассажиры кытта айанныыр оҕолору салгынынан тиэйии:

2-гэр диэри саастаах оҕолор  – босхо (туспа миэстэ бэриллибэт);

2-тэн 12-гэр диэри саастаах оҕолор – чэпчэтиилээх тарифтан 25%  түһэрии (туспа миэстэ бэриллэр).

2018 уонна 2019 сылларга «Якутия» авиахампаанньа 19 туһаайыынан субсидиялаах көтүүлэри оҥоруоҕа, ол иһигэр 8 саҥа маршруту киллэрэн туран, маннык тарифтар олохтоноллор (биир өттүгэр):

Дьокуускай – Владивосток – Дьокуускай – 7 400 солк.*

Дьокуускай – Москва – Дьокуускай – 8 000 солк.*

Дьокуускай – Санкт-Петербург – Дьокуускай – 8 000 солк.*

Дьокуускай – Сочи – Дьокуускай – 8 800 солк.*

Дьокуускай – Красноярскай – Дьокуускай – 6 500 солк.*

Дьокуускай – Новосибирскай – Дьокуускай – 6 500 солк.*

Дьокуускай – Екатеринбург – Дьокуускай – 7 000 солк.*

NEW! Дьокуускай – Благовещенскай – Дьокуускай – 3 000 солк.*

NEW! Дьокуускай – Иркутскай – Дьокуускай – 3 500 солк.*

NEW! Дьокуускай – Магадан  – Дьокуускай – 2 500 солк.

NEW! Дьокуускай – Хабаровскай – Дьокуускай – 3 500 солк.

NEW! Дьокуускай – Южно-Сахалинскай – Дьокуускай – 3 500 солк.*

Нерюнгри – Новосибирскай – Нерюнгри –  7 000 солк.*

Нерюнгри – Москва – Нерюнгри – 8100 солк.*

Анадырь – Хабаровскай – Анадырь – 7000 солк.*

Певек – Москва – Певек – 10 000 солк.*

NEW! Хабаровскай – Южно-Сахалинскай – Хабаровскай – 2 000 солк.*

NEW! Владивосток – Магадан – Владивосток – 4 000 солк.*

NEW! Иркутскай – Өлүөхүмэ – Иркутскай – 3 000 солк.*

* сыана биир туһаайыыга

көтүүгэ ыйылынна

Субсидиялааһын үлэлиир болдьохторун уларытыы Уһук Илин олохтоохторугар ордук суолталаах (үөрэнээччилэр, пенсионердар, доруобуйаларын туругунан хааччахтаах дьон, элбэх оҕолоох дьиэ кэргэттэр), кинилэр Россия киин өттүгэр, кини хотугулуу-арҕаа уонна соҕуруу регионнарыгар улахан ороскуота суох сылы эргиччи  авиациянан тиэйиинэн туһаныахтарын сөп. Маныаха биир гражданин атыылаһар чэпчэтиилээх айан докумуоннарын ахсаана хааччахтаммат.

«Якутия» авиахампаанньа бары рейстэри Sukhoi Superjet 100 уонна Boeing 737 табыгастаах сөмөлүөттэринэн оҥорор.

“ГАВС” АУо матырыйаалынан.