Болҕойуҥ, куонкурус!

Саха Өрөспүүбүлүкэтин Судаарыстыбаннай Мунньаҕын (Ил Түмэн) 25 сылыгар анаммыт “Гражданин буолар эбээһинэстээхпин!”

өйтөн суруйууга өрөспүүбүлүкэтээҕи куонкурус

БАЛАҺЫАННЬАТА

Уопсай балаһыанньалар

Саха Өрөспүүбүлүкэтин Судаарыстыбаннай Мунньаҕа (Ил Түмэн) уонна “Ил Түмэн” Издательскай дьиэ” СӨ Судаарыстыбаннай Мунньаҕын (Ил Түмэн) 25 сылыгар анаммыт өйтөн суруйууга өрөспүүбүлүкэтээҕи куонкуруһу ыыталлар (салгыы – Куонкурус)

Куонкурус сыала-соруга

Сыала: Саха Өрөспүүбүлүкэтин уопсай үөрэҕин тэрилтэлэригэр үөрэнээччилэргэ көхтөөх гражданскай, сокуону тутуһар өйү-санааны үөскэтии, Ийэ дойдуга тапталы иитии.  Бу Куонкурус оҕолор сокуону билиилэрин таһымын үрдэтэр, кинилэргэ правовой култуураны тарҕатар, эдэр ыччакка олоххо көхтөөх сыһыаны иитэр сыалтан ыытыллар.

Куонкурус соруктара:

— правовой култуураны үөскэтэр уонна  таһымын үрдэтэр сыалтан үөрэнээччилэр ортолоругар правовой, гражданскай билиини-көрүүнү тарҕатыы, сырдатыы;

— бэйэ оскуолатын, сэлиэнньэтин, оройуонун, куоратын сытыы суолталаах боппуруостарын быһаарыыга үөрэнээччилэр кыттыыларын көҕүлээһин;

— оҕолор өттүлэриттэн социальнай эйгэҕэ көҕүлээһиннэрин сайыннарыыга уонна олору өйүүр наадатыгар олохтоох салайыныы уорганнарын, уопсастыбаннас, педагогическай кэлэктииптэр болҕомтолорун тардыы.

Куонкурус кыттыылаахтара

Куонкурус кыттыылаахтарынан бары тииптээх, көрүҥнээх уопсай үөрэх тэрилтэлэрин 5-11 кылаастарын үөрэнээччилэрэ буолуохтарын сөп.

Куонкурус түмүктэрэ саастарынан арааран, 2 бөлөҕүнэн таһаарыллаллар: 5-8 кылаастар, 9-11 кылаастар.

Куонкуруһу ыытыы бэрээдэгэ уонна болдьохторо

  Куонкурус 2019 с. олунньу 15 күнүттэн 2019 сыл муус устар 15 к. диэри ыытыллар.

Куонкуруска үөрэнээччилэр айар үлэлэрэ (өйтөн суруйуулара, 6 тыһыынча сурук бэлиэтин чэрчитинэн, бу А4 икки лиискэ тэҥ, кеглин кээмэйэ 12-14) саха уонна нуучча тылынан маннык темаларынан бэриллэллэр:

— «Мин сэлиэнньэм (бөһүөлэгим, куоратым) бүгүн уонна сарсын» (5-8 кылаастарга);

— «Мин сокуонум барыла – өрөспүүбүлүкэм сайдыытыгар»  (9-11 кылаастарга).

Үөрэнээччи үлэтигэр куонкуруска кыттарын туһунан сайаапканы көҥүл көрүҥүнэн суруйан ыытара булгуччулаах.

Бары матырыйааллар бэчээттэнэн уонна электроннай көрүҥүнэн бэриллэллэр.

Куонкуруска кыттар үлэлэр рецензияламматтар уонна төннөрүллүбэттэр.

Үлэлэри сыаналааһыҥҥа ирдэбиллэр:

— суруйуу темата бүгүн төһө суолталааҕын уонна олоххо туһалааҕын  куонкуруска кыттааччы өйдөөһүнэ;

— ыччат, оҕо гражданскай өйүн-санаатын, дойдутугар тапталын ситиитэ;

— үлэ ис хоһооно төһө арыллыбыта.

Тэрийэр кэмитиэт саастарынан икки бөлөххө Куонкурус Гран-притын, I, II, III миэстэлэри быһаарар.

Тэрийэр кэмитиэт анал бириистэри олохтуур быраабы бэйэтигэр хаалларар.

Куонкуруска бастыҥ өйтөн суруйуулар «Ил Түмэн» хаһыакка бэчээттэниэхтэрэ.

Күндү оҕолор! Эһиги үлэлэргитин “Өйтөн суруйуу куонкуруһа” («Конкурс сочинений») бэлиэлээх iltumen@mail.ru электроннай аадырыска эбэтэр маннык аадырыска күүтэбит: Дьокуускай к., Киров уулуссатын 13№-дээх дьиэтэ, 307 кабинет, “Ил Түмэн” хаһыат редакциятыгар.