Президент хонтуруолугар — экологияҕа куттал суох буолуута

«Өрөспүүбүлүкэбитигэр эко­логия боппуруостарыгар мэлдьи ураты болҕомто ууруллар, ол эрэн Бүлүү өрүһү киртитиини кытта сибээстээх кэнники түбэлтэлэр билигин үлэлиир сокуоннарынан сүрүннэммэт түгэннэри көр­дөрдүлэр», — диэтэ норуот депутата.

Владимир Прокопьев сал­гыы айылҕаны харыстыыр со­куоннарга киирбит уларытыылар оҥорон таһаарыыга уонна бы­рамыысыланнаска бастыҥ аны­гы технологиялары туһаныыга ту­һуланалларын, бөҕү харайыыга реформа киллэриллэрин, ураты харыстанар айылҕа сирэ-уота үөскэтиллэрин бэлиэтээтэ.

Кини ааҕарынан, салгыны кир­титэр тобохтору квоталааһын туһунан сокуону ылынарга президент биэрбит сорудаҕа тулалыыр эйгэ тупсуутугар, олох хаачыстыбатын үрдэтиигэ уонна нэһилиэнньэ доруобуйатыгар үтүө сабыдыалланыаҕа.

Владимир Про­копьев климат сы­лыйыытыгар уонна ирбэт тоҥ туругар тобохтору салгыҥҥа бы­раҕыы оруолун санатта.

«Оттон бөҕү харайыы ре­фор­матын олоххо киллэриини таа­рыйдахха, Саха сиригэр үлэ кэ­мигэр саҕаланна итиэннэ ол хайдах ба­рарын биһиги кэтиэхпит. Туох түмүк баарын туһунан этэр эрдэ, ба­лаһыанньа хонтуруолга сылдьар», — диэтэ Ил Түмэн депутата.

Кини экология эйгэтигэр бастыҥ технологиялары туһаныыга наука сүрүн оруоллааҕын бэлиэтээтэ. «Биһиги научнай тэрилтэлэрбитигэр олус эрэнэбит. Чугастааҕы кэмҥэ Бүлүү эргин кэлим научнай чин­чийиилэр бырагыраамаларынан үлэ саҕаланыаҕа», — диэтэ.

Сис кэмитиэт бэрэссэдээтэлэ итини сэргэ Аллайыаха оройуонун сиригэр-уотугар “Кыталык” национальнай паарка тэриллэрин, ол иэнинэн саамай улахан — 1,8 мөл. гектар кэриҥэ буолуоҕун кэпсээтэ. Ити туһунан анал этиитигэр Владимир Путин иһитиннэрдэ.

«Билигин Саха сиригэр ураты харыстанар сир-уот өрөспүүбүлүкэ сирин 37 бырыһыаныттан ордугун ылар. Ол эрээри үгүс айылҕа харыстанар сирдэрэ, ордук олохтоох суолталаахтар, сиргэ докумуоннарын оҥорууну түмүктүү иликтэр. Ити кинилэри сир эргииригэр тардыы кутталын үөскэтэр. Биһиги кэмитиэппит докумуоннары оҥоруу боппуруоһун биирдэ эрэ көтөхпөтөҕө. 2019 сыл муус устарыгар айылҕа ураты харыстанар сирин-уотун сайыннарыы боппуруостарыгар “төгүрүк остуолу” ыытар былааннаахпыт, ол чэрчитинэн бары итинник сирдэргэ наадалаах докумуоннары ревизиялааһыҥҥа хонтуруоллуур тэрээһиннэр ыытыллыахтара», — диэтэ Владимир Прокопьев.

Кини дойду президенэ экологияҕа куттал суох буолуутун боп­пуруостарыгар, бастатан туран, үтүө туруктаах тулалыыр эйгэҕэ нэһилиэнньэ бырааптарын тутуһууга ураты болҕомтону уурарын бэ­лиэтээтэ.

«Анал этиигэ иһиллибит этиилэр экология эйгэтигэр кэккэ кыһалҕалары быһаарар кыаҕы биэриэхтэрэ. Онон салайтаран, биһиги бастыҥтан бастыҥ эко­логическай технологияларга, айылҕаны харыстыыр кытаанах стандартарга кэмигэр көһүүнү, айылҕаны харыстыыр сокуоннары тутуһууну хааччыйыах уонна дойду чөл айылҕатын кэнэҕэски көлүөнэҕэ харыстаан хаалларыах тустаахпыт», — диэтэ Саха сирин норуотун депутата.