Андрей Николаев Сунтаар улууһугар сырытта

Олунньу 18-22 күннэригэр Ил Түмэн мандаакка уонна регламеҥҥа хамыыһыйатын бэрэссэдээтэлэ Андрей Николаев Сунтаар улууһун олохтоохторун иннигэр үлэ түмүктэрин туһунан иһитиннэрии оҥордо.
Депутаты кытта көрсүһүүгэ нэһилиэктэр баһылыктара, улуус депутаттара, оскуолалар учууталлара, оҕо саадын, доруобуйа харыстабылын үлэһиттэрэ уонна уопсастыбаннас бэрэстэбиитэллэрэ кэлбиттэр.
Отчуот кэнниттэн олохтоохтор депутакка кэккэ ыйытыылары биэрэн, олору быһаарыыга көмөлөһөрүгэр көрдөстүлэр.
Андрей Николаев бэйэтин өттүттэн мустубут дьоҥҥо нэһилиэктэр үлэлэригэр көхтөөхтүк кытталларын, туора туран хаалбаттарын иһин махтанна.
Бу үлэлиир кэмигэр норуот депутата 8 нэһилиэккэ сылдьан 32 тус көрсүһүүнү ыытта, Сунтаар оройуонун 24 олохтооҕун туруорсуутун иһиттэ, гражданнар суруктарын үлэҕэ ылла.
«Мин быыбардааччылары кытта үлэҕэ улахан болҕомтону уурабын. Улуус хас биирдии олохтооҕо бигэргэммит график быһыытынан миигин кытта тус көрсүһүүгэ эрэ буолбакка, ханнык баҕарар табыгастаах кэмҥэ төлөпүөнүнэн кэпсэтэр кыахтанна», — диэтэ Андрей Николаев.
Андрей Николаев 2018 с. балаҕан ыйын 9 к. Сун­таардааҕы быыбардыыр уокуруктан өрөспүүбүлүкэ норуотун депутатынан талыллыбыта.