Саха сирэ уонна Япония: доруобуйа харыстабылыгар кэскиллээх былааннар

Россия ырыынагар үрдүк технологиялаах анал оборудование суоҕунан, Япониятааҕы партнердары кытта Саха сиригэр туһаныллар тэриллэри саҥардыыга салгыы бииргэ үлэлээһин туһунан кэпсэтии барда.
«Кылгас болдьоххо бырайыактары туруктаах бииргэ үлэлээһин усулуобуйаларыгар олоххо киллэрэр туһуттан биһиги кыттыгас хампаанньаны тэрийэр кыах туһунан кэпсэттибит, ол хампаанньа лизинг схемаларын олоххо киллэриэн эбэтэр Япония оҥорон таһаарааччылара аан дойдуга лидердэринэн буолар тэриллэригэр ырытыыны оҥоруон сөп», — диэн кэпсээтэ Бырабыыталыстыба бэрэссэдээтэлэ Владимир Солодов.
Билигин өрөспүүбүлүкэҕэ үлэлиир техника үгүс өттө эргэрбитинэн солбуллуоҕа, онуоха анаан техническэй ырытыыны уонна инвентаризацияны ыытар наадалаах.
«Медицинскэй техника уустугуран истэҕин аайы, үлэ туспа хайысхатынан техническэй арыаллааһын уонна медицинскэй тэрилтэлэри хааччыйыы буолаллар. Биһиги Япониятааҕы кэллиэгэлэрбитин кытта бу эйгэҕэ билиини-көрүүнү мунньуохпутун сөп», – диэн эбэн эттэ бырабыыталыстыба бэрэссэдээтэлэ.
“Марубени Корпорейшн” бырамыысыланнас оборудованиетыгар дивизионун кылаабынай толорор директорын солбуйааччы Осаму Миягава этэринэн, кыттыһан үлэлээһин Саха сиригэр доруобуйа харыстабылын эйгэтин тупсарыаҕа: «Доруобуйа харыстабылын сайдыытыгар биһиги лизинг хампаанньатын үөскэтиигэ саҥа инвестиция схематын туһунан этии киллэрдибит. Саха Өрөспүүбүлүкэтэ медицина салаатыгар улахан инвестициялары былаанныыр, Япония бырабыыталыстыбата эмиэ итинник социальнай бырайыактары өйөөһүҥҥэ финансовай схемаларга тардылынна. Онон Япония судаарыстыбаннай өйөбүлүн төрүтүгэр биһиги өрөс­пүүбүлүкэҕэ доруобуйа харыстабылын сайдыытыгар саҥа схемаларга этии киллэриэхпитин баҕарабыт». Тойон Миягава өрөспүүбүлүкэлэр улахан сайдар кыахтарын бэлиэтээтэ итиэннэ Россияҕа хампаанньа чуолаан Саха сиригэр үлэтин саҕалыаҕын туһунан эбэн эттэ.