Төлөпүөнүнэн сүүлүктээччилэр саҥа ньымалара

Маныаха баан үлэһитэбин дэнээччи тустаах киһиэхэ саарбах операция оҥоһулла сатаабытын туһунан этэр уонна карта дааннайдарын иһитиннэрэри ирдиир. Түмүгэр — уоруу тахсар.
Госдума үп ырыынагар кэмитиэтин бэрэссэдээтэлин бастакы солбуйааччы Игорь Дивинскэй ааҕарынан, итинник түгэннэртэн сылтаан бааннарга эрэл мөлтүүр уонна социальнай быһыы-майгы тыҥыыр. Маннык дьайыыларга депутат туох да саҥаны көрбөтүн, ол оннугар масыанньыктар квалификациялара үрдээбитин бэлиэтиир — кинилэр бааннар дьиҥнээх төлөпүөннэрин нүөмэрин үтүктэргэ үөрэммиттэр. Бааннар бэйэлэрин клиеннэригэр ханнык да түгэҥҥэ, оннооҕор баан үлэһиттэригэр баан реквизиттэрин эбэтэр карталар тустарынан иһитиннэриини төлөпүөнүнэн эппэттэригэр сэрэтэллэр.
Россия гражданнарын 80-тан тахса бы­рыһыана баан дебетовай уонна кредит карталарынан туһанар. Онно харчы эргиирэ триллионунан солкуобайынан ааҕыллар, ол да иһин масыанньыктары маҕыньыыт курдук тардар. Хара санаалаахтар аныгы цифровой технологиялары уонна социальнай инженерия ньымаларын туһаналлар. Чуолаан, кредит тэрилтэлэригэр масыанньыктааһын атын көрүҥэ баара көһүннэ — ол курдук буруйу оҥорооччулар баан дуогабардарыгар бэлиэтэммит клиеннэр төлөпүөннэрин нүөмэрин үтүктэн, колл-кииннэргэ эрийэллэр, оттон система итинник эрийбиттэрин арааран быһаарбатаҕына, кинилэр карта балансатын, ханнык операция оҥоһуллубутун уо.д.а. билиэхтэрин сөп. Ол кэннэ ити дааннайдары баан счетуттан харчыны устууга туһаналлар.
Баан иһинээҕи иһитиннэриини бэрэ­биэркэлээһин элбэх таһымнаах систематын тумнар кыахтаах технологиялар үөскээбит түгэннэригэр, буруйу оҥорууну туораппатах эбэтэр онно бэйэлэрин баҕаларынан, билбэккэ да эрэ кыттыгастаах буолбут клиеннэр, бааннар, төлөпүөн сибээһин оператордарын эппиэтинэстэрин чопчулуур, итинник дьайыыларга чуолкай быһаарыылары биэрэр туһааннаах көннөрүүлэри сокуону оҥорооччулар ылыныахтаахтар, диэтэ Дивинскэй.