Күндү Саха сирин  кэрэ аҥаардара!

Саха Өрөспүүбүлүкэтин Судаа­рыстыбаннай Мунньаҕын (Ил Тү­мэ­нин) аатыттан сааскы кэрэ бырааһынньыгынан – Аан дойдутааҕы дьахталлар күннэринэн итиитик-истиҥник эҕэрдэлиибин!
Бу күн биһиги бука бары күн күбэй ийэлэрбитигэр, эйэҕэс эбэлэрбитигэр, эдьиийдэрбитигэр уонна балтыларбытыгар, тапталлаах кэргэттэрбитигэр, нарын-намчы кыргыттарбытыгар ис сүрэхпититтэн тахсар иһирэх тыллары аныыбыт.

Кэрэ аҥаартан саҕаланар киһи төрдө-ууһа, аал уота, алаһа дьиэтэ. Ийэни, кэргэни кытта биһиги саамай истиҥ, сырдык иэйиилэрбитин ситимниибит. Ийэбит мөссүөнүн хас биирдиибит сүрэхпитигэр илдьэ сылдьабыт. Кини оҕолорун сүрэҕин сылааһыгар, истиҥ тапталыгар бигээн, киһи-хара оҥорон таһаарарыгар муҥура суох махтанабыт. Норуоппутугар «Ыал ийэтинэн» диэн бэргэн этии баара элбэҕи этэр.
Ил Түмэн дьиэ кэргэни, ийэ буолууну уонна оҕо аймаҕы сокуон өттүнэн араҥаччылыырга туһуламмыт дьаһаллары ылынар, кинилэр бырааптарын уонна интэриэстэрин көмүскүүргэ сүрүн болҕомтотун уурар. Ол курдук, быйыл Ил Түмэн VІ ыҥырыылаах мунньаҕар дьиэ кэргэн, оҕо аймах кыһалҕаларыгар туһуламмыт саҥа сис кэмитиэт арылынна. Парламент демография бэлиитикэтигэр сокуону оҥорууга, «ийэ хапытаалыгар», оҕо быраабын көмүскэлигэр туһааннаах үлэтин салгыы ыытар.
Күндү Саха сирин дьахталлара! Эһиэхэ махтанан туран, Сахабыт сирин алмааһыныы кытаанах доруобуйаны, бигэ туругу, ыраас тапталы, саппаҕырбат ыра санааны, үөрүү-көтүү аргыстаах уһун үйэлээх олоҕу баҕарабыт!

П.В. Гоголев,
Саха Өрөспүүбүлүкэтин
Ил Түмэнин Бэрэссэдээтэлэ