15 марта 2019 в 13:23

Фарид Мухаметшины кытта көрсүһүү

Аҕыйах хонуктааҕыта Татарстан Судаарыстыбаннай Сэбиэтин Бэрэссэдээтэлэ Фарид Мухаметшин Саха Өрөспүүбүлүкэтин Судаарыстыбаннай Мунньаҕын (Ил Түмэн) наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышеваны кытта көрүстэ. Өрүттэр икки регион парламеннарын икки ардыларыгар бииргэ үлэлээһин боппуруостарын дьүүллэстилэр.

Фарид Мухаметшин бэлиэтээбитинэн, өрөспүүбүлүкэ сокуону көҕүлээһиннэрин Судаарыстыбаннай Мунньах (Ил Түмэн) өттүттэн көхтөөхтүк өйүүллэрин Татарстан Судаарыстыбаннай Сэбиэтэ билэр. 2012 с. сэтинньигэ Татарстан Судаарыстыбаннай Сэбиэтин уонна СӨ Судаарыстыбаннай Мунньаҕын икки ардыларыгар бииргэ үлэлээһин туһунан Сөбүлэһиигэ илии баттаммыта.
Туһааннаах кэмитиэттэр таһымнарыгар эмиэ регионнар парламеннара ыкса сибээһи олохтообуттара. Феодосия Габышева бу күҥҥэ Судаарыстыбаннай Сэбиэт үөрэххэ, култуураҕа, наукаҕа уонна национальнай боппуруостарга кэмитиэтин киэҥ ыҥырыылаах мунньаҕар кыттыыны ылла. Депутаттар болҕомтолорун киинигэр архыып дьыалатын сайдыытын боппуруостара буоллулар.
Фарид Мухаметшин итини сэргэ 2019 с. от ыйын 2-6 кк. Казаньҥа Казаннааҕы (Приволжскай) федеральнай университет базатыгар Татарстан наукаларын Академиятын өйөбүлүнэн ыытыллыахтаах антропология, этнология уонна нациялар икки ардыларыгар сыһыаннаһыылар эйгэлэригэр Аҕа дойду уонна омук сирдэрин исписэлиистэрин, экспердэрин уон үһүс Конгреһын үлэтигэр кытталларыгар Саха Өрөспүүбүлүкэтин бэрэстэбиитэллэрин ыҥырда.

Ольга Благодарова,
Татарстан Өрөспүүбүлүкэтин
Судаарыстыбаннай Сэбиэтин пресс-сулууспата. Андрей Данилов
хаартыскаҕа түһэриитэ.