Турция уонна Саха сирэ: туризм эйгэтигэр сөбүлэһии

Санаттахха, 2019 сыл Турция уонна Россия икки ардыларыгар Туризм уонна култуура сылынан биллэриллибитэ. Муус устар саҥатыгар Турция Президенэ Реджеп Тайип Эрдоган Россияҕа Владимир Путин ыҥырыытынан кэлэ сылдьыаҕа. Быйыл Россия уонна Турция икки ардыларыгар табаар эргиирэ 100 млрд долларга тиийиэхтээх.
Турцияҕа Саха сирин үтүө аатын-суо­лун үрдэтэр сыалтан сыл саҥа­тыгар Анталияҕа Омер Махмудоглу көҕүлээһининэн Турция уонна Саха сирин предпринимателлэрин Ассоциацията тэрилиннэ. Бу саҥа ассоциация Саха сирин уонна Турция икки ардыларыгар хардарыта үлэлээһини тупсарар, ону сэргэ планета саамай тымныы регионун туристическай кыахтарын кытта билиһиннэрэр аналлаах. Ассоциация чилиэннэринэн бөдөҥ туристическай хампаанньалар салайааччылара уонна бас билээччилэрэ буолаллар. Офистара Анталияҕа баар.
«Турция – эһиги иккис төрөөбүт дойдугут диэн ааҕыҥ. Биһиги араас былаахтаахпыт, ол эрээри бииргэбит. Эһиги бэртээхэй өрөспүүбүлүкэҕитин кытта бииргэ үлэлиирбититтэн олус астынабыт. Ассоциация Саха сирин туһунан сурунаал таһаарар былааннаах. Номнуо сэттэ дойду биһиги ассоциациябыт филиалларын аһар баҕалаах. Биһигини элбэх үлэ күүтэр. Саха сирэ чэчирии сайдарын туһугар эһигини кытта үлэлииргэ бэлэммит!», — диэтэ Омер Махмудоглу. Өрүттэр туризм экономика саамай үрдүк дохуоттаах салааларыттан биирдэстэрэ буоларын, регион экономиката сайдыытыгар көдьүүһэ улаханын бэлиэтээтилэр.
Көрсүһүү кэмигэр СӨ предпри­нимательствоҕа, туризмҥа уонна эр­гиэҥҥэ миниистирэ Ирина Высоких бу бииргэ үлэлээһин Турция уонна Саха сирин туристическай кыахтарын көдьүүстээхтик туһаныыга итиэннэ туристическай хайысхалар сайдыыларыгар көмөлөөх буолуоҕун эттэ. Ону таһынан, миниистир чугастааҕы кэмҥэ Турцияттан туристары Саха сиригэр тардыыга бырайыагы саҕалыырга этии киллэрдэ. Бастатан туран, култуура-история ураты объектарын, Саха сирин баай уонна кэрэ айылҕатын бэйэлэрин харахтарынан көрөллөрүн туһугар, Турция туроператордарын уонна блогердарын Саха сирин сүрүн туристическай-рекреационнай зоналарыгар ыҥырар туһунан эттэ. Миниистир бэлиэтииринэн, Турция туристическай сервиһэ саамай сайдыылаахтартан биирдэстэрэ, онон бу эйгэҕэ Турция уопута олус туһалаах буолуоҕа. 2018 сылга Турцияҕа сылдьыбыт турист ахсаана хаһааҥҥытааҕар да муҥутаан 46,11 мөлүйүөҥҥэ тиийбит. Оттон туризмтан дохуоттар 29,51 миллиард долларга тэҥнэспиттэр.
Омер Махмудоглу этэринэн, Саха си­рин уонна Турция икки ардыларыгар чартернай рейстэри тэрийэргэ быһаарыллыбыт. Ону сэргэ Саха сирин туһунан сырдатар сыалтан, ассоциация норуоттар икки ардыларынааҕы быыстапкалыыр Экспокииҥҥэ сылга 15 күн Саха сирин билиһиннэрэр стендэни арендалыырга быһаарбыт – толору Турция суотугар.
Бииргэ үлэлээһин сүрүн көрүҥ­нэринэн методическай уонна ыспыраап­калыыр-иһитиннэрэр матырыйааллары атастаһыы буолуоҕа, олор Турция уонна Саха сирин туристическай бородууктатын таһаарыыга уонна туризм эйгэтигэр кыттыгас бырайыактары оҥорууга туһалыахтара.
Омер Махмудоглу Дьокуускайга көҥүл тустууга Аан дойду кубогар Турция делегациятын састаабыгар кэлбит. Делегация аатыттан бочуоттаах ыалдьыт спортивнай тэрээһин үрдүк таһымҥа ыытыллыбытын иһин Саха сирин Бырабыыталыстыбатыгар ис сүрэҕиттэн махтанна. Түмүгэр Омер Махмудоглу Саха сирин дьонун Турция кэрэ миэстэлэригэр сылдьарга ыҥырда.