Михаил Николаевтыын национальнай бырайыактары дьүүллэһии

Бэлиэтээтэххэ, Айсен Сергеевич уонна Михаил Ефимович элбэх боппуруоска кэмиттэн кэмигэр санааларын үллэстэллэр.
Бу күн 2024 с. диэри магистральнай инфраструктураны саҥардыы уонна сайыннарыы кэлим былаанын уонна Россия Президенэ Владимир Путин 2018 сыл ыам ыйын 7 к. 204 №-дээх ыйааҕынан быһаарыллыбыт 12 национальнай бырайыагы олоххо киллэрии механизмнарын дьүүллэстилэр. Михаил Николаев «марсианскай дэриэбинэни» – климат аһара намыһах температуратын усулуобуйаларыгар үлэ технологияларын сертификациялыыр киин бырайыагын туһунан кэпсээтэ. Бастакы Президент бэлиэтээбитинэн, бырайыагы НА СС уонна Россия Наукаларын академията биһирээбиттэр.
Итини сэргэ Михаил Ефимович «АТОМЭКСПО» норуоттар икки ардыларынааҕы форумҥа Саха сирин саҥаны айааччыта Анатолий Чомчоев бырайыага — дьоҕус автономнай атомнай генератор көрдөрүллүөҕүн туһунан Ил Дархаҥҥа кэпсээтэ. Электроэнергияны балайда кэмчилиир кыахтаах мини-атомнай станция, тургутууну ситиһиилээхтик ааһар түгэнигэр, кинини ыраах сытар, суола-ииһэ суох нэһилиэнньэлээх пууннарга туруоруохха сөп.
Итини таһынан көр­сүһүүгэ Саха сирэ Илиҥҥи экономическай форумҥа кыттыытын, судаарыстыба салайыытын көдьүүһүн үрдэтии боппуруостара дьүүллэһилиннилэр.

СӨ Ил Дарханын уонна  Бырабыыталыстыбатын пресс-сулууспата.