Өлүөнэ муостатыгар Экономика министиэристибэтэ сөбүлэһэр түмүгү биэрдэ

Россия Экономикаҕа министиэристибэтэ Өлүөнэ муостатын бырайыагын РФ тырааныспарга инфраструктуратын саҥардыы Кэлим былааныгар киллэриини тоҕоостооҕунан аахта. Ити туһунан Саха сирин баһылыга Аймен Николаев суруналыыстары кытары көрсүһүүгэ иһитиннэрдэ. Кини санаатынан, бу бырайыагы олоххо киллэриигэ боччумнаах хардыы буолар.

«Эһиги өйдүүр буоллаххытына, Экономика министиэристибэтэ уонна Тырааныспар министиэристибэтэ уопсай санааҕа кэлиэхтээхтэрин туһунан элбэхтик этиллибитэ, бу түгэҥҥэ муоста баар буолуоҕа. Ити боппуруос үчүгэй өттүгэр быһаарыллыан сөбүн бэлиэтигэр Экономика министиэристибэтэ тоҥхох гынна диэн ааҕыҥ», — диэн эттэ кини.
Өрөспүүбүлүкэ баһылыга бы­һаарбытынан, өрөспүүбүлүкэ өттүттэн көрүүгэ бырайыак концессия усулуобуйаларыгар, федеральнай уонна өрөспүүбүлүкэ бюджеттарыттан үбү, ону сэргэ чааһынай инвестордар харчыларын тардан олоххо киллэриллиэн сөп. Билигин дьүүллэһиллэр схеманан, 75% федеральнай бюджеттан грант быһыытынан бэриллиэхтээх, 10 % — өрөспүүбүлүкэ бэйэтигэр ылыныаҕа, 15% чааһынай инвестор угуохтаах.
«Биһиги тугу да кистээбэппит, муоста биһиэхэ наадалаах, ол иһин 10% кээмэйинэн үбүлээһини көрөргө бэлэммит», — диэн бэлиэтээтэ кини.
Бу иннинэ Уһук Илиҥҥи федеральнай уокурукка РФ президенин боломуочуйалаах бэрэстэбиитэлэ Юрий Трутнев бырайыагы олоххо киллэрии чааһыгар Саха сирин салалтатын өйүүргэ бэлэмин иһитиннэрбитэ.
Мин Айсен Сергеевиһы кытта бииргэ тоҕо туох эмэ бы­һаарыыны ыла уонна көмөлөһө сатыыбыный? Тоҕо диэтэргит, муоста көдьүүһэ бырайыагы көннөрү технико-экономическай өттүнэн быһаарыы чэрчитинэн ааҕыллыбат. Кини интегральнай буолан тахсар, ол аата миэстэтигэр олох уларыйыытыгар сабыдыаллыыр. Биһиги ити боппуруоһу быһаара сатыахпыт. Ханнык да түгэҥҥэ муоста олох наадата суох диэн санаа бырабыыталыстыбаҕа суох», — диэбитэ кини.