Александр Жирков Госдума кэмитиэтин истиилэригэр кытынна

СӨ Судаарыстыбаннай Мунньаҕын (Ил Түмэн) Бэрэссэдээтэлин бастакы солбуйааччыта Александр Жирков муус устар 2 к. Москваҕа СНГ, евразиятааҕы интеграция дьыалаларыгар уонна биир дойдулаахтары кытта сибээстэһиигэ Кэмитиэт тэрийиитинэн ыытыллыбыт «О гуманитарном векторе международной политики РФ на современном этапе» диэн темаҕа парламент истиилэригэр кытынна.

Парламент истиилэригэр спикер быһыытынан Госдума Бэрэссэдээтэлин солбуйааччы Сергей Неверов, туһааннаах кэмитиэт бэрэссэдээтэлэ Леонид Калашников, Госдума норуоттар икки ардыларынааҕы дьыалаларга Кэмитиэтин бэрэссэдээтэлэ Леонид Слуцкай, Россотрудничество салайааччыта Элеонора Митрофанова үлэлээтилэр.
Норуоттар икки ардыларынааҕы култуурунай бииргэ үлэлээһиҥҥэ Президент анал бэрэстэбиитэлэ, СНГ кыттыыллаахтара дойдулар гуманитарнай бииргэ үлэлээһиҥҥэ Судаарыстыбалар икки ардыларынааҕы фондаларын хос бэрэссэдээтэлэ Михаил Швыдкой, РФ Ааҕар-суоттуур палаататын аудитора Татьяна Мануйлова, “Россия сегодня” МИА телеханаал кылаабынай редактора Маргарита Симоньян сүрүн дакылааттары оҥордулар.
Парламент истиилэрин кыттыылаахтара дойду тас политикатын стратегиятын чааһын быһыытынан РФ гуманитарнай политикатын туспа концепциятын оҥорор туһунан этии киллэрдилэр.
Санаа атастаһыытын кэмигэр бэлиэтэммитинэн, аан дойдуга Россия гуманитарнай сабыдыала кэнники 28 сылга балайда аччаабыт итиэннэ сокуонунан өйөбүлү ирдиир. Ол курдук, нуучча тылын үөрэтээччи ахсаана аҕыйыы турар, иһитиннэрии ресурсаларын, интернет-сайтар хаачыстыбалара аныгы ирдэбиллэртэн хаалан иһэр, култуура эйгэтигэр атастаһыы, култуурунай миссиялар далааһыннара ситэтэ суохтар. Ити туһунан Госдума СНГ, евразиятааҕы интеграция дьыалаларыгар уонна биир дойдулаахтары кытта сибээстэргэ Кэмитиэтин баһылыга Леонид Калашников иһитиннэрдэ.
Кини Россия гуманитарнай политикатыгар үөрэх оруолугар, Россиятааҕы үөрэхтээһин өҥөлөрүн аан дойду ырыынактарыгар таһаарыыга, Россия вузтарыгар омук дойдуларын каадырдарын бэлэмнээһиҥҥэ, дойду тас өттүгэр Россияҕа үөрэҕи бүтэрбиттэри кытта үлэҕэ сыһыан төрдүттэн уларыйара ирдэнэрин эттэ. “Россия вузтарыгар 182 омук дойдутуттан ыччат үөрэнэригэр баара-суоҕа 15 тыһ. квоталаах миэстэ ананар”, – диэн бэлиэтээтэ кини.

«Үөрэххэ талыы хампаанньатын кэмигэр биир миэстэҕэ 7,4 киһи куонкуруска кыттар. Биһиги сыаналааһыммытынан, 30-ча тыһыынча соҕотох бюджет квотатыгар наадыйыы баар», — диэтэ Россотрудничество салайааччыта Элеонора Митрофанова.
Кини салгыы Россия үөрэҕин үгүс өттүгэр 3 макрорегионтан ылар баҕалаахтарын бэлиэтээтэ – бу ССРС урукку дойдулара, Азия уонна Африка дойдулара (квота ахсааныттан 85%).
Парламент истиилэрин кэмигэр 2030 сылга диэри кэмҥэ Россия норуоттар икки ардыларынааҕы гуманитарнай бииргэ үлэлээһинин стратегиятын оҥороругар итиэннэ ону сокуонунан хааччыйыыны тупсарыыга этиилэрин Госдумаҕа киллэрэригэр, ол иһигэр 2020 сылга уонна онтон салгыы былааннаммыт үс сылга федеральнай бюджет барылын оҥорууга үбүлээһини улаатыннарыыны көрөрүгэр РФ Бырабыыталыстыбатыгар этилиннэ.