Сүрэх этэринэн

Муус устар 12 күнүгэр Депутатскай бөһүөлэгин “Металлург” култуура дьиэтигэр “По зову сердца” диэн аһымал акция буолан ааста. Бу үгэскэ кубулуйбут үтүө санаа акцията Алексеевтар дьиэ кэргэҥҥэ көмөлөһөр сыаллаах ыытылынна.

Айталина Алексеева икки оҕолоох аҥардас ийэ, Депутатскай «Умка» оҕо саадыгар социальнай педагогунан үлэлиир. Хомойуох иһин, икки оҕотугар иккиэннэригэр төрүөхтэриттэн ДЦП диэн диагноз туруорбуттара. Ол да буоллар алта саастаах Айтал уонна кырачаан биир саастаах Адам — бөҕөх санаалаах уолаттар.
Бөһүөлэк олохтоохторо, кэлэктииптэрэ, Депутатскай оскуолатын учууталлара, үөрэнээччилэрэ, төрөппүттэр бу сэмэй дьиэ кэргэн кыһалҕатыттан туора турбакка, ис сүрэхтэриттэн көмөлөһөр санаанан, ас-үөл, мал-сал дьаарбаҥкатын, лотерея тэрийэн ыыттылар. Киэһэтин кэнсиэр тэрийэн, олохтоохтору сэргэхситтилэр. Маны таһынан, харчы хомуйан, Алексеевтар дьиэ кэргэҥҥэ уопсайа 272 тыһыынча солкуобай харчыны үөрдэ-көтүтэ туттардылар.

Аһымал акцияны оройуон Уопсастыбаннай сэбиэтэ, Дьахтар сэбиэтэ, «Биир ньыгыл Арассыыйа» баартыйа олохтоох салаата, «Арассыыйа ийэлэрэ» уопсастыбаннай тэрилтэ, «Биир ньыгыл Арассыыйа Эдэр гвардията» тэрийэн ыыттылар. Оройуон уонна бөһүөлэк дьокутааттара актыыбынай кыттыыны ыллылар.
Маннык хабааннаах тэрээһин нэһилиэги өрүү түмэр, дьон кыһалҕатыгар болҕомтолоох буоларга үөрэтэр, кэнчээри ыччакка үтүө холобур буолара саарбахтаммат.