Элбэх оҕолоох ыаллар кыһалҕаларын тула

РФ федеральнай мунньаҕын федеральнай сэбиэтин судаарыстыбаннай уонна муниципальнай хонтуруолга быстах кэмнээх хамыыһыйата Саха өрөспүүбүлүкэтигэр үлэтин иһинэн Ил Түмэҥҥэ элбэх оҕолоох дьиэ кэргэни кытта көрсүһүү ыытта.

Тэрээһиҥҥэ быстах кэмнээх хамыыһыйа бэрэссэдээтэлэ, Федерация Сэбиэтин парламенскай үлэҕэ уонна регламеҥҥа кэмитиэт бэрэссэдээтэлэ Андрей Кутепов, ФС социальнай политикаҕа кэмитиэт чилиэнэ Татьяна Кусайко, СӨ бырабыыталыстыбатын бэрэссэдээтэлин солбуйааччы Алексей Стручков, СӨ бырабыыталыстыбатын бэрэссэдээтэлин солбуйааччы Ольга Балабкина, Ил Түмэн дьиэ кэргэн уонна оҕо аймах дьыалаларыгар кэмитиэт бэрэссэдээтэлэ Алена Атласова, Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар Ил Түмэн сис кэмитиэтин бэрэссэдээтэлэ Елена Голомарёва уонна да атыттар кытыннылар.

Андрей Кутепов көрсүһүү саҕаланыытыгар парламент хамыыһыйатын чилиэннэрэ Саха сирин элбэх оҕолоох ыалларын ордук ханнык боппуруостар долгуталларын туһунан истиэн баҕарарын эттэ. Кини федеральнай таһымҥа элбэх оҕолоох ыаллары өйүүр ханнык социальнай миэрэлэр киирэргэ бэлэмнэнэллэрин туһунан иһитиннэрдэ. Элбэх оҕолоох ыалларга нолуок ноҕуруускатын чэпчэтиини, ипотеканан дьиэ ылбыт кредиттэрин төлүүллэригэр көмө быһыытынан 450 тыһ. солк. федеральнай бюджеттан үбү көрөр, чааһынай дьиэ тутталларыгар көмө көрүҥнэрин туһунан боппуруостар көрүллэллэрин туһунан кэпсээтэ.
Көрсүһүүгэ кэлбит элбэх оҕолоох ыаллар олохторугар көрсөр кыһалҕаларын туһунан кэпсээтилэр. Ол курдук сокуонунан көрүллэр судаарыстыбаннай чэпчэтиилэри ылалларыгар уустуктары көрсөллөрүн туһунан эттилэр – босхо учаастагы ылыыга уочарат улаханын, босхо бэриллэр эмп көрүҥэ аҕыйаҕын, оҕо саадыгар оҕо аһылыгын үбүнэн толуйуу, коммунальнай төлөбүргэ чэпчэтии суохтарын туһунан этиннилэр. Маны таһынан төрөппүттэр хаарбах уонна саахалланар туруктаах дьиэттэн көһөрүү үлэтигэр, элбэх оҕолоох дьиэ кэргэн олорор усулуобуйатын тупсарыыга болҕомто ирдэнэрэ тоҕоостооҕун эттилэр уонна дьиэ кэргэн оҕолорун кытта өрөспүүбүлүкэ таһыгар чэбдигирдии санаторийдарыгар сынньана баралларыгар чэпчэтиилээх путевка туһунан баҕа санаалаахтарын туһунан эттилэр.
Андрей Кутепов көрсүһүү түмүгэр өрөспүүбүлүкэҕэ элбэх оҕолоох дьиэ кэргэни уонна оҕо аймаҕы өйөөһүҥҥэ уонна ыал сыаннастарын өрө тутууга үлэ барарын туһунан санаатын эттэ. Ону таһынан сенатор көрсүһүүгэ киирбит этиилэри элбэх оҕолоох ыаллары өйөөһүн испииһэгэр киллэриэхтэрин уонна салгыы көрүөхтэрин туһунан эттэ. “Биһиги регионнарга элбэх оҕолоох дьиэ кэргэни өйүүр миэрэлэр, сокуоннар хайдах үлэлииллэрин туһунан мониторинг оҥоробут, миэстэтигэр көрөбүт. Ол матырыйааллар Федерация Сэбиэтигэр дьүүлэһиллэ сылдьар элбэх оҕолоох ыал туһунан сокуону бэлэмнээһиҥҥэ туһалыаҕа”, — диэн Андрей Кутепов түмүктээтэ.