Көҥүлэ суох сыбаалкалары суох оҥоруохтара

“Экология” национальнай бырайыак

2024 сылга диэри Саха сирин куораттарыгар түөрт көҥүлэ суох сыбаалканы суох оҥоруохтара. Бу үлэ “Экология” национальнай бырайыак “Ыраас дойду” бырагырааматын иһинэн барыаҕа.

2020 сылга Дьокуускай, 2021 сылга Ньурба, 2024 сылга Бүлүү уонна Мирнэй куораттарга көҥүлэ суох сыбаалкалары суох оҥоруохтара.
Ньурба улууһугар уонна Ньурба куоракка ууну ыытар кииннэммит тиһик суох. Куоракка 90 автономнай септик баар, онтон сылын аайы 300 тыһ. куб убаҕас тобохтору таһаараллар. Ньуккаан күөл таһыгар баар убаҕас тобохтору мунньар полигон туолан турар уонна сотору кэминэн таһынан барар кутталлаах. Оччоҕо тулалыыр эйгэ экологиятыгар улахан охсуулаах буолара сабаҕаланар.
Ил Түмэн сир сыһыан­наһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев Ньурба куорат сыбаалкатын чөлүгэр түһэрии боппуруостарыгар мунньах ыытта. Ньурба дьаһалтатын, экология министиэристибэтин, тутуу министиэристибэтин бэрэстэбиитэллэрэ кытыннылар.
Мунньахха кэпсэтии түмүгэр кэккэ быһаарыныылары ылыннылар. Ньурба улууһун дьаһалтата сыбаалканы чөлүгэр түһэрии бырайыагын оҥорор уонна саҥа полигону тутар бэдэрээччики быһаарара ирдэнэр. Ойуур фондатын сирин бырамыыссыланнай үлэлэргэ аналлаах сиргэ көһөрөн саҥа полигон тутааһын биир сүрүн үлэнэн буолуоҕа. Маныаха бу сири туһанааһыҥҥа суолталаах төрүөт баара дакаастаныахтаах. Бу сиргэ сыбаалка тутарга РФ Бырабыыталыстыбатыттан ойуур фондатын сирин атын категория сиргэ көһөрөр туһунан докумуон ирдэнэр. Көһөрүү бырассыаһа уустук, онон экология министиэристибэтин тустаах специалистара үлэлэһиэхтэрэ. Оттон тутуу министиэристибэтэ бырайыак-смета докумуонун экспертизатыгар көмөлөһүөҕэ. Бырайыак үлэтэ бүттэҕинэ саҥа полигон тутуутугар өрөспүүбүлүкэ министиэристибэлэрэ үп источнигын көрдүөхтээхтэр. Бу үлэ 50%-нын Ньурба улууһа бэйэтин бюджетыттан уйунарга бэлэм.

Ил Түмэн пресс-сулууспата