Быһа биэриинэн киэҥ эйгэҕэ тахсыаҕа

Нам улууһун баһылыга Юрий Слепцов иһитиннэрбитинэн, Олоҥхо ыһыаҕар бэлэмнэнии үлэтэ түмүктүүр түһүмэҕэр үктэммит. Быйыл буолар ыһыаҕы национальнай каналынан быһа көрдөрүөхтэрэ. 

Атын регион уонна кыраныысса таһыгар олорор дьон Олоҥхо ыһыаҕын быһа эфиринэн көрүөхтэрин сөп буолар. Маны таһынан Олоҥхо ыһыаҕар Хотугу норуоттар VII спортивнай оонньууларын уотун уматыы уонна эстафетанан тиэрдии саҕаланыаҕа.

Тэрийэр хамыыһыйа Олоҥхо ыһыаҕар 30-35 тыһ. киһи ыалдьыттаан барарын сабаҕалыыр. Алтайтан, Казахстантан, Санкт-Петербургтан, Уһук Илин уокурук бэрэстэбиитэллэрэ, шашкаҕа аан дойду чемпионат кыттыылаахтара ыалдьыттыы кэлэллэрэ былааннанар. Ыһыахха 70 культурнай уонна спортивнай тэрээһин буолуоҕа, ол иһигэр сүрүннэринэн култуурунай, спортивнай күрэхтэһиилэр, уус-уран быыстапкалар, ат сүүрдүүтэ уонна да атыттар. Олоҥхону этиигэ саамай сыаналаах биириһинэн УАЗ массыынаны туруорбуттар.

Буоларын курдук биир саамай чаҕылхай тэрээһининэн Олоҥхо ыһыаҕын арыйыы уонна түмүктээһин көрдөрүүлэрэ буолуохтара, онно уопсайа 2700 киһи кыттара былааннанар. Ыһыаҕы арыйыы уонна түмүктээһин туруорууларын кылаабынай режиссерынан Руслан Тараховскай, сценариһынан Зоя Попова буолаллар.

Ыам ыйын 21 күнүгэр Ил Түмэн бэрэссэдээтэлин бастакы солбуйааччыта Александр Жирков, СӨ бырабыыталыстыбатын вице-спикера Ольга Балабкина, Ил Түмэн судаарыстыба тутулугар уонна сокуону оҥорууга сис кэмитиэтин бэрэссэдээтэлэ Алексей Еремеев, култуура уонна духуобунай сайдыы миниистирэ Юрий Куприянов ыһыахха бэлэмнэнии үлэтин кытары билистилэр, тутулла турар эбийиэктэри көрдүлэр. Нам култууратын уонна сынньалаҥын пааркатыгар сылдьан киирэр арка тутуутун, Аал Луук Мас, 3150 миэстэлээх киин трибуна, Аар Багах ураһа, күнү көрсүү былаһааккатын, балаҕан тутууларын көрдүлэр. Улуус күүһүнэн 10 балаҕан уонна 9 ураһа тутуута бара турар.

Улуус баһылыга Юрий Слепцов этэринэн, олоҥхоһуттар, суруйааччылар, худуоһунньуктар аллеяларын тас көстүүтэ быһаарыллыбыт. Сэлиэнньэҕэ дьон көхтөөхтүк субботниктарга тахсар, бэс ыйын 15 күнүттэн улуус кыраныыссатыттан саҕалаан сэлиэнньэҕэ диэри суоллары биир моһуонунан киэргэтэн саҕалыахтара.

Инфокоммуникационнай технология, цифровой сайдыы уонна инновация министиэристибэтин бэчээт уонна информацияны тарҕатар салааҕа судаарыстыбаннай политика салаатын салайааччыта Елена Захарова этэринэн, атын регионнар уонна дойдулар Олоҥхо ыһыаҕын интэриэһиргииллэр. “Намҥа ыытыллар ыһыаҕы быһа эфирга таһааран көрдөрүү — бу маҥнайгы уопуппут. Биһиги култуурабытын атын дойдулар интэриэһиргииллэр. Ол иһин быһа эфири үрдүк хаачыстыбалаахтык көрдөрө сатыахпыт”, — диэтэ.

Олоҥхо ыһыаҕар спортивнай күрэхтэһиилэр 10 көрүҥүнэн ыытыллыахтара. Үгэс буолбут “Байанай бэлэҕэ” ох саанан ытыы, ыстаҥа, хапсаҕай, мас тардыһыыта, остуол оонньуулара, гиирэ спорда уонна да атыттар.

Бэлэмнэнии үлэтин кытары билсиһии түмүгэр вице-спикер Александр Жирков ыһыаҕы тэрийэр хамыыһыйаҕа Олоҥхо ыһыаҕа үрдүк таһымнаахтык ыытылларын туһугар кыһаллалларыгар ыҥырда.

Татьяна Васильева