Виктор Губарев: Арыгыта суох олох иһин — бары түмсэн

Ил Түмэн бэрэссэдээтэлин солбуйааччы, Саха сиринээҕи РФКП рескомун бастакы сэкирэтээрэ Виктор Губарев СӨ Уопсастыбаннай палаататын бэрэссэдээтэлин солбуйааччы, «Трезвая Якутия» уопсастыбаннай хамсааһын чилиэнэ Елена Шудряны кытта көрүстэ диэн парламент пресс-сулууспата иһитиннэрдэ.

Бүгүҥҥү күҥҥэ өрөспүү­бүлүкэҕэ арыгылааһыны, алкоголизмы уонна наркоманияны төрдүттэн суох оҥорууга улахан үлэ барар. «Союз борьбы за народную трезвость», «Трезвая Якутия», «Матери против наркомании» уопсастыбаннай тэрилтэлэр ситиһиилээхтик үлэлииллэр.
Чөл, арыгыта суох олоҕу тарҕа­тыыга үгүс сылларга бэйэлэрин дьыалаларыгар дьиҥнээх патриоттар Карл Башарин, Матвей Лыткин, Елена Шудря, Людмила Григорьева дьарыктаналлар. Туһааннаах түмүктэр бааллар: өрөспүүбүлүкэҕэ 189 сэлиэнньэ арыгыта суох зонанан биллэриллибитэ. Дойдуга оҕо төрөөһүнүгэр намтааһын көстөрүн үрдүнэн, Саха сиригэр балаһыанньа туруктаах.
Итини сэргэ, Елена Ивановна бэлиэтээбитинэн, маннык боппуруостар улахан дьиксиниини үөс­кэтэллэр: Арктика улуустарыгар арыгылааһын уонна алкоголизм итиэннэ дьахтар арыгылааһына иэдээннээх содулланна.
Өрөспүүбүлүкэ киин куоратын олохтоохторун пиибэ атыылыыр туочукалар элбии тураллара долгутар. Дьон маннык атыыны боболлоругар былаастан туруорсар, илии баттааһын хомуллар. Биир уокурукка, Шудря иһитиннэрбитинэн, номнуо 80 пиибэ атыылыыр туочука баар буолбут.
От ыйын 4-5 күннэригэр СӨ Уопсастыбаннай палаатата ыытар Гражданскай форумугар Арктикаҕа чөл олоҕу тарҕатыыга бырайыактары билиһиннэриэхтэрэ. Виктор Губарев уонна Елена Шудря Ил Түмэҥҥэ РФКП фракцията уонна Саха сиринээҕи РФКП рескома, комсомол рескома, “Надежда России” хамсааһын, өрөспүүбүлүкэҕэ баар уопсастыбаннай тэрилтэлэр уонна хамсааһыннар арыгылааһыны, алкоголизмы уонна наркоманияны утары охсуһууга бииргэ үлэни ыыталларын туһунан сөбүлэстилэр.