“Мантан инньэ бары спортсмен буолуохпут”

Бэҕэһээ, от ыйын 4  күнүгэр  Амма улууһун Бөтүҥ нэһилиэгин адаптивнай спорт комплекса үөрүүлээхтик арыллыбыта. Өрөспүүбүлүкэ Ил Дархана Айсен Николаев, Ил Түмэн спикера Петр Гоголев, кабмин Владимир Солодов бэйэлэринэн кэлэн үөрүүлээх быһыыга-майгыга кыттыыны ылбыттара. Спорткомлекс бары өттүнэн толкуйданан, доруобуйаларыгар хааччахтаах дьоҥҥо бары ирдэбилгэ сөп түбэһэр табыгастаах гына тутуллубут.

Олохтоохтор үөрүүлэрэ үгүс. Биллэн турар, тыа сиригэр спорт саалалаах буолуу ыччат, оҕо аймах спордунан дьарыктанарыгар, чөл олоҕу батыһарыгар суолтата улахан.

Анастасия Никитина, Бөтүҥ нэһилиэгин олохтооҕо: “Быйыл биһиги нэһилиэккэ бэлиэ күн үүннэ. Балтараа тыһыынча нэһилиэнньэлээх, икки сүүстэн тахса үөрэнээччилээх нэһилиэк буолабыт. Өр сылларга спортивнай саалата суох буолан, оскуола оҕолорун, ыччаты ыаллыы сытар Чапчылҕан нэһилиэгэр кыһыннары оскуола массыынатынан таһан үөрэттэрбиппит, дьарыктаабыппыт. Оҕо ахсаана сыл аайы эбиллэ турар. Бу аныгылыы бары өттүнэн табыгастаах спорт комплекс Оонньуулары кытта тэҥҥэ арыллыбыта, итиэннэ Ил Дархаммыт Айсен Николаев, Ил Түмэн спикерэ Петр Гоголев, норуот дьокутааттара бэйэлэринэн кэлэн үөрүүбүтүн тэҥҥэ үллэстибиттэригэр олохтоохтор өрөгөйбүт үс бүк үрдүк. Мантан инньэ бары дьарыктанар, бары спортсмен буоларбыт буолуо (күлэр).

Саалабыт суох эрдэҕинэ да ыччаттарбыт, инбэлииттэрбит спорт араас көрүҥнэригэр үрдүк көрдөрүүнү ситиһэллэрэ. Хайдах дьарыктанар сирэ суох эрээри кыайыыны ситиһэҕит диэн өрүү сөҕөөччүлэр. Мантан инньэ спортивнай көрдөрүүбүтүн өссө үрдэтиэхпит диэн эрэнэбит.

Онон улууспут баһылыгар Николай Архиповка, нэһилиэкпит баһылыгар Саргылана Борисоваҕа, түөлбэлэрбит салайааччыларыгар, итиэннэ олохтоохторго барыларыгар махталбын тиэрдэбин. Субуотунньукка тура тэбинэн, бары биир киһи курдук турунан, сибэкки олордуута, хомунуу, сууйуу-тарааһын үлэтигэр күн бүгүҥҥэ дылы көхтөөхтүк кыттыбыппыт дьону сомоҕолоото. Суолбут-ииспит оҥоһулунна. Аны саҥа оскуолабыт бу күһүн билии күнүгэр үөрүүлээх арыллыытын долгуйа кэтэһэбит”.

Биллэрин курдук, Амма спорду өрө тутар улуус. Волейболга, хайыһарга тэҥнээҕэ суох. Мантан да атын көрүҥнэргэ элбэх ыччат чемпион үрдүк аатын сүкпүтэ. Онон саҥа саалабыт көрдөрүүбүтүн өссө тупсарыа диэн олохтоохтор эрэллэрэ улахан. Бары кэриэтэ, оҕолор, ыччаттар кэлэн дьарыктаныахпыт, эппитин-хааммытын эрчийиэхпит диэн үөрэ-көтө эрэннэрдилэр.

Ирина Ханды,  Амма.