Суруналыыс үйэтин тухары үөрэнэр

Бэс ыйын 28 күнүгэр Дьокуускай туонатыгар Арассыыйа суруналыыстарын сойууһа “Инфорум” диэн суруналыыстары үөрэтэр былаһаакката үлэлээтэ

Пуорумҥа 170 тахса киһи кытынна. Арассыыйа суруналыыстарын сойууһун бэрэссэдээтэлэ Владимир Соловьев тэрээһин үрдүк таһымнаахтык барбытын бэлиэтээтэ.

Пуорумҥа Арассыыйа биллэр-көстөр суруналыыстара, иһитиннэрэр-биллэрэр эйгэ үлэһиттэрэ, блогердар олус сэргэх лекциялары, маастар-кылаастары ыыттылар. Этэргэ дылы, аныгы суруналыыстыка кистэлэҥин арыйдылар.
Пуорумҥа чуолаан өрөспүүбүлүкэ өттүттэн Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Кирилл Бычков тыл эттэ. Кини Саха сиригэр суруналыыстыка олоҕу кытта тэтимнээхтик баран иһэрин сырдатта. Сахалыы тыллаах суруналыыстыка өрөспүүбүлүкэҕэ ураты миэстэни ылар диэн бэлиэтээтэ.

СӨ Суруналыыстарын сойууһун бэрэссэдээтэлэ Галина Бочкарева Саха сиригэр суруналыыстар күннэтэ көрсөр кыһалҕаларын кэпсээтэ. Кини, чуолаан, хамнас кыратын, суруналыыс статуһун үрдэтэр наадатын, эдэр исписэлииһи өйүүргэ туһуламмыт дьаһаллар тула санаатын эттэ.

Ил Түмэн дьокутаата, «Ситим» медиагруппа гендиректора Мария Христофорова бэчээт эйгэтин өйүүр наадалааҕын ыйда. Кини былааһы кытта ситимнээх үлэ барыахтааҕын эттэ, олохтоох сахалыы тыллаах суруналыыстыканы өйүүр кэм кэллэ диэн бэлиэтээтэ.
Санатар буоллахха, Арассыыйа үрдүнэн Саха Өрөспүүбүлүкэтин суруналыыстарын сойууһа саамай улахан эрэгийиэннээҕи тэрилтэнэн буолар.
Маастар-кылаастар суруналыыс билиитигэр эрэ буолбакка, кэм ирдэбилигэр сөп түбэһэр билиҥҥи кэмҥэ саамай наадалаах тиэмэлэри таарыйдылар. Ол курдук, суруналыыс былааһы кытта өйдөспөт түгэнигэр сытыы боппуруостары хайдах уодьуганныыр, сымыйа информацияны сыымайдыыр, араас кыһалҕалаах дьон тиэмэтин хайдах тиэрдэр туһунан, социальнай ситимҥэ информацияны биэрии кистэлэҥнэрин кэпсээтилэр.
Спикердар даҕаны Арассыыйа СМИ-тин биллэр-көстөр дьоно: Илья Лочканов (“Комсомольская правда”), Виталий Непомнющий (“Аргументы и факты”), Бастакы ханаал суруналыыһа Антон Верницкай уо.д.а. бэйэлэрин уопуттарыгар олоҕуран сэргэх маастар-кылаастары ыыттылар.

Арассыыйа Суруналыыстарын сойууһун инфорума регионааҕы иһитиннэрэр-биллэрэр эйгэ үлэһиттэрин түмэр, үөрэтэр практикум буолар. Былырыын Арассыыйа 21 регионугар «Инфорум» буолан ааспыта. Уопсайа 5 тыһыынча киһи кыттыыны ылбыта. Быйыл «Инфорум» дойду 25 уобалаһын хабар соруктаах.

Ирина Ханды