Хоту сири өйөөһүҥҥэ туох көрүллэрий?

Мунньахха «2015 сылга уонна 2016-2017 сс. былааннаммыт кэмҥэ Саха Өрөспүүбүлүкэтин судаарыстыбаннай бюджетын туһунан» СӨ Сокуонугар уларытыылары киллэрии туһунан сокуон барыла көрүлүннэ. Дакылааты үп миниистирэ Валерий Жондоров оҥордо. Кини туһааннаах кэмитиэт үлэлэһэр туһаайыыларыгар сиһилии тохтоото. Ол курдук, Арктикаҕа, хотугу оройуоннарга аччыгый уонна орто предпринимательство субъектара электрическэй, сылаас энергиятын туһанар ороскуоттарыгар аадырыстаах субсидияҕа анаан барыта 380 мөл. солк. көрүллүбүт, оттон электричествоҕа – 10 мөл. солк. Социальнай суолталаах аһылык табаардарын, ол иһигэр бурдугу тиэйэр тэрилтэлэргэ 45,9 мөл. солк. ыытыллара былааннанар.

Валерий Жондоров иһитиннэрбитинэн, инвестиция программата 7 млрд 595 мөл. солк. улаатыаҕа. Арктика улуустарыгар доруобуйа харыстабылын тэрилтэлэрин хапытаалынай өрөмүөнүгэр 74 мөл. 600 тыһ. солк. эбии ыытыллыаҕа, «Сахабулт» материальнай-техническэй базатын техническэй саҥардыыга ороскуоттары толуйууга – 25 мөл. солк. Хоту сир аҕыйах ахсааннаах төрүт норуоттарын өйөөһүҥҥэ 4 мөл. 295 тыһ. солк. ананыаҕа.
Парламентарий Владимир Членов Арктика 5 улууһугар федеральнай бюджеттан харчы ананар дуо диэн ыйытыытыгар Валерий Жондоров харчы киирэ илигин эттэ. Арктика оройуоннарын сирин-уотун ыраастааһыҥҥа сайаапкалар ыытыллыбыттар. Ол эрээри миниистир федеральнай бюджеттан эбии субсидиялар кэлэллэрин эттэ: 11 мөл. 972 тыһ. солк. – көс төрүт уус общиналар материальнай-техническэй базаларын тупсарыыга, 2 мөл. 453 тыһ. солк. – Хоту сир аҕыйах ахсааннаах төрүт норуоттарын оҕолорун сынньалаҥын тэрийиигэ уонна чэбдигирдиигэ. Ону таһынан культура сайдыытыгар уонна уус-уран дьарыктарыгар – 5 мөл. 839 тыһ. солк.

Табаһыттар хамнастарын 20 тыһ. солк. диэри үрдэтии туһунан ыйытыылар иһилиннилэр.
Кэккэ норуот депутаттара көҕүлээбит Хоту сир аҕыйах ахсааннаах төрүт норуоттарын төрүт уус көһө сылдьар общиналарын туһунан СӨ Сокуонугар уларытыылары киллэрии туһунан сокуон барыла бастакы ааҕыы режимигэр көрүлүннэ. Сокуон барылын быһыытынан, сокуон 12 ыстатыйатын «е» пуунугар уларыйыы киириэхтээх. Ол курдук, аҕыйах ахсааннаах норуоттар олохсуйбут төрүт эйгэлэрин уонна олохторун үгэс буолбут укулаатын, бырааптарын уонна сокуоннай интэриэстэрин харыстыыр сыалтан Саха сирин судаарыстыбаннай былааһын уорганнара общиналарга, сойуустарга (ассоциацияларга) социальнай-экономическай көмө регионнааҕы уонна олохтоох программаларын оҥорууга, олоххо киллэриигэ социальнай сакаас быһыытынан судаарыстыба өйөбүлүн биэриэх тустаахтар.

Ону сэргэ депутаттар иккис сокуону көҕүлээһиннэрэ – «Булт туһунан уонна булт ресурсаларын харыстааһын туһунан» СӨ Сокуонугар уларытыылары киллэрии туһунан» сокуон барыла көрүлүннэ. Депутаттар Сокуон 3 главатыгар олох үгэс буолбут майгытын уонна үгэскэ киирбит хаһаайыстыбаннай үлэни хааччыйар сыалтан ыытыллар бултааһын туһунан 14-с ыстатыйаны эбэргэ этиилээхтэр. Ити бултааһын көҥүллүк, ханнык да көҥүлү ылбакка эрэ, тус бэйэ туһаныытыгар анаан тэриллиэхтээх.

Мунньахха итини таһынан «Саха Өрөспүүбүлүкэтин Хоту сирин аҕыйах ахсааннаах төрүт норуоттарын айылҕаны үгэс курдук туһанар сирдэрин уонна үгэскэ киирбит хаһаайыстыбаннай үлэлэрин туһунан» СӨ Сокуонугар уларытыылары киллэрии туһунан» сокуон барылыгар көннөрүүлэри дьүүллэстилэр. Ил Түмэн кэккэ уураахтара көрүлүннүлэр.