Норуот Хуралын 25 сылынан эҕэрдэлээтэ

СӨ Судаарыстыбаннай Мунньаҕын (Ил Түмэн) Бэрэссэдээтэлэ Петр Гоголев Бурятия Өрөспүүбүлүкэтин Народнай Хуралын депутаттарын 25 сыллаах үбүлүөйдэринэн эҕэрдэлээтэ. Бу бэлиэ түгэн бэс ыйын 27 к. Улан-Удэҕа Бурятиятааҕы судаарыстыбаннай академическай опера уонна балет театрын саалатыгар буолла.

Саха сирин парламенын спикерэ Бурятиятааҕы кэллиэгэлэрин – Народнай Хурал бары ыҥырыыларын депутаттарын үлэтин үрдүктүк сыаналаата. 25 сыл устатыгар Бурятияҕа уопсастыбаннай сыһыаннаһыылар олоххо суолталаах бары эйгэлэригэр нуормалыыр быраап базата үөскэтилиннэ.
Петр Гоголев бэлиэтээбитинэн, Бүгүҥҥү күҥҥэ Народнай Хурал Россия Федерациятыгар регионнааҕы бэрэстэбиитэллээх уонна сокуону таһаарар былаас тиһигэр дьоһун миэстэни ылар, Россия парламентаризмын салгыы сайдыытыгар уонна бөҕөргөтүүгэ туһаайан үлэлиир.
Кини Ил Түмэн уонна Народнай Хурал икки ардыларыгар доҕордуу сыһыан олохтоммутун бэлиэтээтэ. 2019 с. бэс ыйын 27 к. Бурятия парламена тэриллибитэ 25 сылыгар анаммыт тэрээһиннэр чэрчилэринэн сөбүлэһиигэ илии баттааһын сиэрэ-туома ыытылынна.
Икки өрөспүүбүлүкэ парламена федеральнай сокуоннар барылларын бэлэмнээн, дьүүллэһэн баран, сокуону көҕүлээһин быраабын олоххо киллэрии бэрээдэгинэн Госдумаҕа киллэрэр былааннаахтар.
Эҕэрдэ тылын түмүктүүрүгэр Ил Түмэн спикерэ депутаттарга чэгиэн доруобуйаны, дьолу уонна бары саҕалааһыннарыгар ситиһиилэри баҕарда.
Үөрүүлээх мунньахха сүрүн дакылааты Народнай Хурал спикерэ Владимир Павлов оҥордо. Кини парламент хас биирдии ыҥырыыта өрөспүүбүлүкэ сайдыытыгар бэйэтин кылаатын киллэрбитин, оттон ылыллыбыт сокуоннар дьон олоҕун тупсарыыга туһаайыллалларын бэлиэтээтэ.
Бурятия Баһылыга Алексей Цыденов махтал уонна алгыс тылларын эттэ. Кини толорор уонна сокуону таһаарар былаас салаалара норуот иннигэр улахан эппиэтинэһи сүгэллэрин эттэ.
Народнай Хурал аадырыһыгар дойду бары муннугуттан уонунан, сүүһүнэн эҕэрдэ телеграммалар киирдилэр. Федерация Сэбиэтин бэрэссэдээтэлэ Валентина Матвиенко аатыттан эҕэрдэ тылы сенатор Александр Варфоломеев эттэ. Онно өрөспүүбүлүкэ парламена дойду бүттүүнүн сокуону оҥорор үлэтигэр сыаналаммат кылааты киллэрбитэ бэлиэтэнэр.
Народнай Хурал 1994 сылга тэриллибитэ, итиэннэ Бурятия Үрдүкү Сэбиэтин утумнааччынан буолар. Бастакы сессия ити сыл от ыйын 19 к. буолбут, оттон 25 сыл устатыгар барыта 186 мунньах ыытыллыбыт.