Арктика оройуоннарыгар — күүстээх кадырдары

Феодосия Габышева уонна Елена Голомарева Арктика оройуоннарыгар педагогическай кадырдары бэлэмнээһин туһунан мунньахха кытыннылар.

Үөрэх салаатын үлэһиттэрин атырдьах ыйынааҕы мунньахтарын былаһааккатыгар кыттааччылар сытыы боппуруостары ырыталлар. Атырдьах ыйын 20 күнүгэр “Арктика үөрэҕин тэрилтэлэрин специалистарынан хааччыйыы” диэн тиэмэҕэ буолбут төгүрүк остуолга Ил Түмэн үөрэххэ, наукаҕа, култуураҕа, көрдөрөр-иһитин­нэрэр средстволарга  уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Феодосия Габышева, Ил Түмэн хотугу аҕыйах ахсааннаах төрүт норуоттар боппуруостарыгар уонна Арктика дьыалаларыгар сис кэмитиэтин бэрэссэдээтэлэ Елена Голомарева кытыннылар.

Кэпсэтиигэ хас да предметы баһылаан үөрэтэр учууталлары бэлэмниир тоҕоостооҕун туһунан бэлиэтээтилэр, холобур биология,  химия уруоктарын, эбэтэр математика уонна информатика уруоктарын биэрэр учууталлары бэлэмниир туһунан. Абый, Анаабыр, Өлөөн оройуоннарын кадырдарынан хааччыйыы хайдах ыытыллыан сөбүн көрбүттэр.

Төгүрүк остуол түмүгэр кыттааччылар бу боппуруоһу ырытыы туһалааҕын бэлиэтээбиттэр, тустаах этиилэри киллэрбиттэр.Ол курдук, тус дуогабарынан үлэҕэ ылыыны элбэтэр, учууталлары бэлэмниир үөрэх кыһаларын иһинэн квалификацияны үрдэтии куурустарын элбэтэр уонна болдьоҕун уһатар туһунан этиилэр киирбиттэр. Эдэр специалист олохсуйарыгар көмөнү сокуонунан бигэргэтэр наадалааҕын эппиттэр.