Оскуолабыт, дорообо! Чугдаар-ыллаа чуораан

Былырыыҥҥы көрдөрүүттэн, быйылгы үөрэх сылыгар Дьокуускай куорат оскуолаларыгар 3 тыһ.тахса элбэх оҕо үөрэнэрэ билиннэ диэн «Yakutia-daily.ru» иһитиннэрдэ.

2019-2020 үөрэх дьылыгар Дьокуускай к. 51 оскуола паартатыгар 48 048 оҕо олоруоҕа, оттон 2018-2019 сс. 45 059 оҕо үөрэммитэ. Бу иһигэр аан маҥнайгытын 4 896 оҕо оскуола боруогун атыллыаҕа. Куораттааҕы Үөрэх управлениетын кэтээн көрөр уонна үөрэх хаачыстабатын бэрэбиэркэлиир отдела иһитиннэрбитинэн, сыл ахсын үөрэххэ киирэр оҕолор испииһэктэрин бэрэбиэркэлиир. Испииһэк бэрэбиэркэтэ уонна тэҥнээн көрүүтэ, оскуолаҕа киириэхтээх оҕо приемнай хампаанньата үлэлээн бүтэр бүтэһик күнүгэр – балаҕан ыйын 5 к. диэри ыытыллар. Дьокуускай куорат баһылыгын социальнай боппуруостарыгар солбуйааччыта Наталья Степанова бэлиэтээбитинэн, бастакы кылааска киирэр оҕолору испииһэктиир бириэмэҕэ харгыстар үөскээбиттэринэн, куораттааҕы классическай гимназияҕа, 17 №-дээх оскуолаҕа, Саха гимназиятыгар уонна Национальнай гимназияҕа эбии кылаастар арыллан үлэлиэхтэрэ. Ол курдук, холобура, 1 №-дээх 325 миэстэлээх оскуолаҕа быйылгы үөрэх дьылыгар 634 оҕо үөрэниэ, оттон бырайыагынан 500 миэстээлэх 5 №-дээх оскуолаҕа 1374 оҕо киириэ. Отдел үлэһиттэрэ этэллэринэн, бастакы кылааска киирэр оҕолору испииһэктээһин Геологтар бөһ. 18 №-дээх, Птицефабрика оройуонугар 19 №-дээх, Пригород оройуонугар 12 №-дээх, Газовиктар бөһ. 32 №-дээх оскуолаларыгар салгыы ыытыллар. Быйыл толору биир сменаҕа үөрэтии аҕыйах оскуолаҕа тэрилиннэ, ордук куорат аттынааҕы оскуолаларга – Табаҕа, Хаҥалас, Геологтар бөһүөлэктэригэр, ону таһынан В.П. Ларионов аатынан физико-техническэй уонна Н.А. Алексеева аатынан техническэй лицейдэргэ. Эрдэтинэ, үөрэнээччи ахсаана сылга 2000-2500 оҕо буолар эбит буоллаҕына, быйыл оҕо ахсаана 3000 үөрэнээччигэ тиийдэ. Дьокуускайдааҕы Үөрэх управлениета оҕо ахсаана элбээбитин улуустартан куоракка киирии уонна атын регионнартан миграциялааһын түмүгэр үрдээбитин бэлиэтиир.
Санатар буоллаха, быйылгы үөрэх дьылыгар куорат киинигэр 4 саҥа оскуола үлэтин саҕалыа – 203 микрооройуоҥҥа “Айыы кыһата”, 6, 35 уонна 25 №-дээх оскуолалар. Ол эрэн, ноҕурууска баарын үрдүнэн, бастакы кылааска киирэр оҕолору 100% хабар былааннаахтар.

2019 сылга Саха сиригэр 2595 миэстээлээх 12 саҥа оскуола үлэҕэ киирэрэ былааннанар.
Үс оскуола тутуллан бэлэмнэр. Тоҕус оскуола балаҕан уонна ахсынньы ыйдарыгар үлэлэрин саҕалыахтара. Ол курдук, 90 миэстээлээх Абый улууһун Абый нэһ., 80 миэстэлээх Сунтаар улууһун Уһун Күөл нэһ. уонна 500 миэстэлээх Дьокуускай куоракка оскуолалар ааннарын астылар. Бу күннэргэ 220 миэстэлээх оскуола тутуута Амма улууһун Бөтүҥ нэһ. түмүктэниэ. Атын оскуолалар тутуулара ахсынньы ыйга түмүктэнэрэ күүтүллэр – Өймөкөөн улууһун Томтор сэл. 220 миэстэлээх, интернаттаах 220 миэстэлэрдээх Булуҥ улууһун Күһүр сэл. уонна Мэҥэ Хаҥалас улууһун Петровка сэл., 80 миэстэлэрдээх Бүлүү улууһун Таһаҕар сэл. оскуолалар, 35 уонна 18 миэстэлэрдээх оскуола-саадтар Кэбээйи улууһун Лүксүгүн сэл. Маны таһынан, Дьокуускайга «Сосновый бор» сынньалаҥ уонна доруобуйа киин территориятыгар норуоттар ардыларынааҕы Арктикатааҕы оскуола, 360 миэстэлээх 5 №-дээх орто оскуола саҥардыллыбыт лаборатория, үөрэх куорпустарыгар уонна 350 миэстэлээх Бүлүү трассатын……. 4 км турар 4 этээстээх уопсайга оскуолалар арыллан үлэлиэхтэрэ. Билиҥҥи туругунан, саҥалыы үөрэх эйгэтин тэрийэргэ, иккис смена үөрэтиитин сарбыйан уонна үөрэнээччилэри саҥардыллыбыт объектарга көһөрүү Саха сирин “Развитие образования Республики Саха (Якутия) на 2016-2022 годы и на плановый период до 2026 года” судаарыстыбаннай бырагыраама «Содействие созданию новых мест в общеобразовательных организациях Республики Саха (Якутия)» подпрограммаҕа киллэриллэн оскуола тутуулара, капитальнай өрөмүөннэрэ уонна оптимизациялааһына ыытыллар. Бу бырагыраама иһинэн, 2025 сылга 61106 саҥа үөрэх миэстэтэ арыллыахтаах.

Бэйэбит корр.