1091
31 июля 2015 в 11:06
Атырдьах ыйын 1 күнүттэн элбэх квартиралаах дьиэлэргэ арыгыны атыылыыр бобуллар
Ил Түмэн уочараттаах 17-с пленарнай мунньаҕар норуот депутаттара «Саха Өрөспүүбүлүкэтигэр алкогольнай бородууксуйаны розницанан атыылааһын бириэмэтин, усулуобуйаларын уонна миэстэлэрин эбии хааччахтааһыны олохтуур туһунан» Саха Өрөспүүбүлүкэтин Сокуонун 2 ыстатыйатыгар уларытыылары киллэрии туһунан» сокуон барылын бүтэһиктээх ааҕыыга ылыммыттара. Бу туһунан парламент пресс-сулууспата иһитиннэрбитэ.
Докумуоҥҥа сөп түбэһиннэрэн, 2015 сыл атырдьых ыйын 1 күнүттэн ыла Саха сиригэр элбэх квартиралаах олорор дьиэлэргэ, ол иһигэр иһирдьэ, сыһыары, иһирдьэ-сыһыары тутуллубут сирдэргэ атыылыыр объектары үлэлэтэр тэрилтэлэр уонна биирдиилээн предпринимателлэр алкогольнай бородууксуйаны розницаҕа атыылыылларын тохтотор эбээһинэстээхтэр.
«Ресторан» тииптээх тэрилтэлэртэн ураты общественнай аһылык тэрилтэлэрэ (кафелар, бардар, кафетерийдар уо.д.а.) алкогольнай бородууксуйаны розницаҕа атыылыылларыгар 20 чаастан 14 чааска диэри бириэмэнэн хааччахтааһын олохтонор.
Сокуоҥҥа уларытыылары киллэрии түмүгэр алкогольнай бородууксуйаны бытархай атыылааһын ураты ирдэбиллэригэр итинник объектар миэстэлэрэ сөп түбэспэт буоллаҕына, атыы-эргиэн объегар арыгы бородууксуйатын атыылааһыны тэрилтэ эбэтэр биирдиилээн предприниматель тохтотор эбээһинэстээхтэр.
Маныаха лицензия төрүтүгэр арыгыны атыылыыр тэрилтэлэр итинник балаһыанньа үөскүөҕүттэн 30 күн устатыгар лицензиялыыр уоргаҥҥа докумуону уларытан оҥорор, эбэтэр лицензия дьайыыта болдьоҕун иннинэ тохтуурун туһунан сайабылыанньа түһэриэхтээхтэр.
Лицензияны болдьоҕун иннинэ тохтотор түгэҥҥэ төлөммүт судаарыстыба пошлинатын сууматын төннөрүү оҥоһуллубат.
Өрөспүүбүлүкэ сокуоннарын ирдэбиллэригэр сөп түбэспэт уонна арыгыны атыылыылларын салгыыр атыы-эргиэн обьектарын булар түгэҥҥэ, тэрилтэлэр уонна биирдиилээн предпринимателлэр административнай эппиэтинэскэ тардыллыахтара.
Ил Түмэн экономика, инвестиция уонна промышленность политикатыгар, предпринимательствоҕа, туризмҥа уонна инфраструктура сайдыытыгар сис кэмитиэтин бэрэссэдээтэлэ Виктор Федоров:
— Бу уларытыылар, бастатан туран, уопсастыба этиитигэр олоҕурбуттара, үгүс дьон, ордук куорат олохтоохторо, кинилэр олорор дьиэлэригэр баар объектарга арыгыны атыылааһын мөлтөх дьайыылааҕын туһунан эппиттэрэ. Санаттахпына, биһиги өрөспүүбүлүкэ Президенэ 2013 сылга киллэрбит сокуонун барылыгар төннүбүппүт, салгыы депутаттар көннөрүүлэринэн саҥардыллыбыта, оччолорго элбэх квартиралаах дьиэлэргэ арыгыны атыылыахха сөп, ол эрээри алкомаркеттарга эрэ диэбиппит. Иккис көннөрүү общепитка сыһыаннаах, ол эбэтэр предпринимателлэр быыс-хайаҕас була охсубуттара, онон билигин общепитка пиибэни бириэмэнэн хааччахтаммакка атыылыыллар. Итини учуоттаан, сокуон барыла маннык атыыны тохтотууга, ону сэргэ ити «кафелар» иэннэрин «60 миэтэрэттэн кырата суох» гына улаатыннарыыга туһаайыллыбыта.
Биһиги ыйаах чэрчитинэн эрэ буолбакка, кэлимсэ былаан туһунан этэбит диэн бэлиэтиир тоҕоостоох, ол эбэтэр итинник общепит тэрилтэлэрин уонна оҕо, оскуола иннинээҕи үөрэх, ону сэргэ культура дьиэлэрин икки ардыларыгар сир ырааҕын, алкомаркеттар рекламаларын, уопсайынан, ити «кафелар» үлэлэрин бэрээдэктииллэригэр муниципалитеттарга чопчу ыйыылары тиэрдиэх тустаахпыт.
