Гульсум Бейсембаева: “Сурутуу – депутат дьыалата”

«Ил Түмэн» хаһыакка сурутуу эмиэ биһиги, депутаттар, дьыалабыт буолуохтаах. Чуо­лаан биһиги, депутаттар, парламент үлэтин туһунан өрөспүүбүлүкэ олохтоохторо билэллэригэр интэриэстээхпит эбээт. Сорохтор бары иһитин­нэриини Интэриниэттэн булан ааҕыахха сөп диэн миигин кытта мөккүһүөхтэрин сөп. Ол эрээри, хаһыаты илиилэригэр тута үөрэммит аҕа саастаах дьон бааллар. Кинилэр хаһыаты суруталлара олус суолталаах. Саҥа күн сибиэһэй хаһыаттан саҕаланара бэйэтэ туспа сиэр-туом кэриэтэ буолар.

Ол иһин сурутуу хампаан­ньатын кэмигэр мин Мииринэй улууһун муниципальнай тэрил­лиилэрин баһылыктарыгар, тэрилтэлэр салайааччыларыгар туһаайан, «Ил Түмэн» хаһыакка төһө кыалларынан элбэх киһи сурутара наадатын этэбин.
Алтынньы 13 күнүттэн Бүтүн Россиятааҕы сурутуу дека­дата уонна «Үтүө санаа маһа» киэҥ хабааннаах аһымал акция ыытылла турар. Бу ха­һыаттарга уонна сурунаалларга улахан чэпчэтиилээх суруйтарар дэҥҥэ көстөр кыах буолар. Итиэннэ туох эмэ биричиинэнэн наадалаах хаһыаккка эбэтэр оҕо сурунаалыгар сатаан сурутар кыаҕа суох дьоҥҥо көмө. Үгүс биир идэлээхтэрим туһааннаах акцияҕа кытталларын билэбин. Мин парламент хаһыатыгар үс бэтэрээни уонна икки оскуоланы суруйтарабын. «За женщин России» норуот баартыйатын чилиэннэрэ номнуо иккис сылын «Харысхал» дьиэ кэргэн уонна оҕо киинигэр оҕолорго аналлаах сурунааллары, хаһыаттары суруталлар. Ити курдук, «Үтүө санаа маһа» кыаҕырар уонна биһиги өйөбүлбүтүгэр наадыйар тулалыыр дьоҥҥо болҕомтолоохтук сыһыаннаһарга көмөлөһөр.
Бары кэллиэгэлэрбин, депутаттары, сурутуу хам­паанньатыгар көхтөөхтүк кыттарга ыҥырабын! Суруна­лыыстар сыаллара-соруктара – парламент хаһыатын маты­рыйааллара ааҕааччыга туһа­лаах уонна кэрэхсэбиллээх буолалларын ситиһии. Оттон биһиги, депутаттар, сыалбыт-сорукпут – «Ил Түмэн» хаһыат Саха сирин хас биирдии ыалын дьиэтигэр тиийэрин туһугар сурутуу үлэтигэр көхтөөхтүк кыттыы.