898
24 октября 2016 в 09:41
Саха Өрөспүүбүлүкэтин гражданскай уопсастыба институттарын сайдыытыгар миниистирэ Сардана Михайловна Гурьева улуус хаһыаттара уонна общественнай түмсүүлэр» төгүрүк остуолга кытынна
Чурапчы улууһун «Саҥа олох» хаһыат 85 сыллаах үбүлүөйүн бэлиэтиир дьаһаллар чэрчилэринэн алтынньы ый 15 күнүгэр «Улуус хаһыаттара уонна общественнай түмсүүлэр» диэн ааттаах төгүрүк остуол ыытыллынна. Төгүрүк остуолу Саха Өрөспүүбүлүкэтин гражданскай уопсастыба институттарын сайдыытыгар министиэристибэтэ, Чурапчы улууһун дьаһалтата, Чурапчы улууһун общественнай сүбэлэрэ түмсэн тэрийбиттэрэ.
Саха Өрөспүүбүлүкэтин гражданскай уопсастыба институттарын сайдыытыгар миниистирэ Сардана Михайловна Гурьева, министиэристибэ сүрүннүүр специалиһа Виктория Юрьевна Пахомова уонна илин эҥэр хаһыаттарын эрэдээктэрдэрэ, коллективтара, улуус общественнай түмсүүлэрэ, социальнай хайысха тэрилтэлэрин салайааччылара кыттыыны ыланнар тэрээһин таһыма олус үрдүк буолла. Улуус дьаһалтатыттан баһылыгы социальнай боппуруоска солбуйааччы Октябрина Филипповна Петрова, Улуус мунньаҕын бэрэссэдээтэлэ Яков Павлович Оконешников, общественнай хамсааһыннары салайсар специалист Татьяна Петровна Бушкова төгүрүк остуол ыытыллыытын сүрүннэһэн кэпсэтии уонна дьүүллэһии киэҥник ыытыллынна, үлэҕэ ыйыылары, туруорсуулары олус таһымнаахтык эттилэр. Төгүрүк остуолга барыта 110 киһи кыттыыны ылла, ол иһигэр түөрт улуус редакциятларын коллективтара.
