«Мин олбуорум» бырайыакка 20 миллиард ананна

Парламент истиилэригэр Госдума депутаттара, РФ субъектарын административнай кииннэрин, олохтоох салайыныы баһылыктара, регионнар сокуону оҥорор уонна толоруулаах уорганнарын бэрэстэбиитэллэрэ, экспердэр кытыннылар.
Истиилэри салайан ыыппыт Госдума Бэрэссэдээтэлин солбуйааччы Сергей Неверов киирии тылыгар бэлиэтээбитинэн, 2017 сылга уонна 2018-2019 сс. былааннаммыт кэмҥэ бюджет көннөрүүтүн быһыытынан 20 млрд солкуобай «Мин олбуорум» диэн бырагыраамаҕа ананна. Кини этэринэн, «Мин олбуорум» бырайыак «мээнэҕэ көстүбүт буолбатах», быыбар иннинээҕи хампаанньа, быыбардааччылары кытта көрсүһүү кэмигэр торумнаммыта. Кини Россия Президенэ бэйэтин Анал этиитигэр бу бырайыагы өйөөбүтүн, дьон олорор уулуссаларын, оҕо былаһааккаларын уонна пааркалар тустарынан туох баҕа санаалаахтарын билэн сүбэлэһэр, уопсастыбаннай сэбиэттэри тэрийэр туһунан ыйбытын бэлиэтээтэ.
2017 сыл бюджетыгар киирбит бырайыакка партия сыһыаннааҕын Сергей Неверов «Биир ньыгыл Россия» фракцията бюджет иһин биир киһи курдук куоластаабытынан быһаарда, онон парламент хонтуруолун чэрчитинэн бюджекка тыырыллыбыт үп төһө көдьүүстээхтик ороскуоттанарын көрүөхтээҕин эттэ.
Сүрүн этиини РФ тутууга уонна дьиэ-уот коммунальнай хаһаайыстыбатыгар миниистирэ Михаил Мень оҥордо. Хос дакылааты Денис Леонтьев – «КБ Стрелка» ХЭТ генеральнай директора иһитиннэрдэ, регионнар бэрэстэбиитэллэрэ бэйэлэрин куораттарыгар олбуордары тупсарыы үлэтин туһунан кэпсээтилэр.
Экспердэр уонна регионнар бэрэстэбиитэллэрэ куораттарга уопсай эйгэ сайдыытын, нэһилиэнньэлээх пууннары, ол иһигэр олбуордары кэлимник тупсарыыга регионнар бастыҥ уопуттарын, ону сэргэ ити үлэҕэ олохтоохтору тардыы ньымаларын итиэннэ куорат эйгэтин тупсарыыга чааһынай инвестордары тардыы боппуруостарын дьүүллэстилэр.
Тэрээһиҥҥэ Госдума олорор дьиэ политикатыгар уонна дьиэ-уот коммунальнай хаһаайыстыбатыгар кэмитиэтин бэрэссэдээтэлин бастакы солбуйааччыта Александр Сидякин уонна Госдума Бэрэссэдээтэлин солбуйааччыта Владимир Васильев кытыннылар.
«Биир ньыгыл Россия» партия «Мин олбуорум» бырайыагы ураты хонтуруолга ылла.
Парламент истиилэрин сүбэлэригэр Федерация субъектарыгар маннык ыйыылар бааллар: уопсай эйгэлэри тупсарар тэрээһиннэри олоххо киллэриигэ муниципальнай тэриллиилэри киэҥник тардыыга усулуобуйалары уонна үбүнэн өйөбүлү оҥоруу; муниципальнай быраабылалары уонна тупсарыы бырагыраамаларын уопсастыбаҕа дьүүллэһии регламенын оҥорон олоххо киллэрии; сири-уоту тупсарыы быраабылаларын тутуһууга уопсастыба хонтуруолун тэрийии; бырайыактааһыҥҥа чааһынай инвестордары тардыы систематын үөскэтии; тупсарыы объектарын кыттыһан үбүлээһин уонна туһаныы.
Парламент истиилэрин кыттыылаахтара «Куорат тупсаҕай эйгэтин үөскэтии» инники күөҥҥэ тутуллар бырайыак чэрчитинэн Федерация субъектарыгар уонна олохтоох салайыныы уорганнарыгар уопсастыбаннай эйгэни сайыннарыы соруктарын быһаарыыга наадалаах методическай көмөнү оҥороругар, ону сэргэ гражданнар бас билиилэригэр баар элбэх квартиралаах дьиэлэр чугастарыгар баар муниципальнай сири-уоту тупсарыы уонна көрүү-истии бырагыраамаларын олоххо киллэриигэ сокуон механизмын оӨороругар Россия тутууга уонна ДьУоКХ министиэристибэтигэр сүбэлээтилэр