796

17 марта 2017 в 13:02

Кэнтиккэ ньиэп булуллубут

  Сахабыт сирэ бараммат баайдааҔын өссө төгүл биллибит-иһиттибит. Биир үтүө күн Интернет социальнай ситимнэринэн Уөһээ Бүлүү Кэнтик сэлиэнньэтигэр гааһы, ньиэби булбуттар үһү диэн сонун тилийэ көттө. СураҔы чуолкайдаары, «Ил Түмэн» хаһыат редакциятыттан нэһилиэк баһылыгар Валерий Валерьевич Николаевка эрийэ сырыттыбыт. Баһылык үгүһү кистии, элбэҔи эбэ сатаабакка, хайдах баарынан биһиэхэ кэпсээтэ. - Сурах кырдьыктаах. Тохсунньу бүтүүтэ Кэнтик сиригэр хара тыаны кэтэр анал техникалар сыбыытаабыттара. Биһиги тугун-ханныгын билээри кинилэр сэлиэнньэттэн 20 км тэйиччи олохсуйбут сирдэригэр бара сылдьыбыппыт. Онно «Сибгеотех» диэн научнай-чинчийэр институт НовосибирскайдааҔы салаатын үлэһиттэрэ кэлэн, сир аннын баайын көрдүүр үлэтин ыыта сылдьаллар эбит. Онтон сотору буолан баран, ол сиргэ ньиэби уонна гааһы булбуттарын биллэрдилэр. Быһа холоон, ньиэп 10-ча км усталаах сиргэ,  5 км дириҥҥэ баарын билбиттэр. Салгыы ньиэби хачайдыыр техникалары аҔалан туруораллара былааннанар. Билигин ньиэп хаачыстыбатын быһаарар үлэни ыыталлар. Төһө саппаас баарын ыйыталаспыппар: «Эһиги үйэҔитигэр тиийэр саппаас баар», - диэн хоруйдаабыттара. Мин билигин кимнээх хостуохтарын, ол үлэттэн төһө дохуоттаныахтарын этэр кыаҔым суох. Биллэн турар, ону «Роснедра» федеральнай агентство быһаарара буолуо. Арай биһиги, кэнтиктэр, үлэ миэстэтэ тахсыаҔа, олохтоох бүддьүөккэ үп киириэҔэ диэн эрэх-турах санаалаахпыт. Ити сирдэри эрдэттэн да «Уһук Илиҥҥи гектар» сокуонунан бэриллибэт гына оҥорбуттар этэ. Аныгы үйэҔэ сайдыы күүскэ өтөн киирэр. Син биир хаһан эрэ ньиэп, гаас баар сирин баһылыыллар. Хайдах даҔаны бэйэбит бүөмнээн, алааһынан тарҔанан олорор кыахпыт суох. Экологиябыт эрэ айгыраабатар.